تحدث شقيق مطرب المهرجانات مسلم عن بداياته في الفن، قائلا: «كان بيطلع على كتفي وهو صغير علشان يغني».
مضافًا خلال حواره الخاص لـ موقع «أوان مصر» الإخباري: «مسلم في بداياته كان بيتكلم كتير أنه أول ما يتشهر هيخلي مسوانا المادى أحسن، وهيعيشنا عيشة كويسة، وهرفعكم لكن أول ما أشتهر محدش شافه، وبقى مبيرودش على أي واحد من أخواته ولا عليا، وهو من زمان غاوي غناء وكان بيغني على التليفون».
متابعاً: «وأخر مرة شفته فيها كان في 2019 يوم عزاء والدنا، وقتها جه يوم واحد وميشي، ومكنش في أي مشاكل، وبقيت اكلمه يكنسل عليا لما عرف أن ده رقمي، وأنا مش عاوز منه حاجة أنا عاوز حقي ونتصالح وننسى المحاكم والقضايا اللي ما بينا».
شقيق مسلم: بعد ما أشتغل في الفن بقى يكنسل عليا وأتغير معانا
وفي ذات الحوار، قال: «مسلم اتغير بعد ما وصل للفن ومفيش أي تواصل بينا، ونفسي أخد حقي قالي تعالى مدينتي، وأنا في مدينتي، وبعدين بقى يكنسل عليا، وبعدين عملي حظر، وده اللي ضايقني منه».
مستكملاً يحيى شقيق مؤدي المهرجانات مسلم: «أنا نفسي أحضنه وأسلم عليه والناس مش مصدقة أنه اخويا، علشان ملناش صور مع بعض، ومش بيكلمني، ولو طلب مني اتنازل وهيديني حقي هتنازل، لأن ده أخويا، وانا مش هسيب حقي لو جنيه واحد، وانا مش عاوز قضايا، وهو عارف ظروفي ايه، ومش عايز منه أي حاجة تاني».
مختتماً: «أنا وضعي على باب الله، معنديش حتى تلاجة أشرب منها ماية ساقعة، وكل اللي أنا عاوزه هو حقي من الورث، وهو لو قالي أزيك هيبقى يوم عيد عندي، ودي صلة رحم لازم نتكلم ونسأل عن بعض، وأنا مش بكره بالعكس أنا بدعيله».