اشتكى احد عملاء شركة فودافون من سوء الخدمة المقدمة له عبر محفظة كاش، متهمًا الشركة بأنها تماطل في رد مبلغ 3 آلاف جنيه تم سحبهم من رصيده.
وجاءت شكوى عميل فودافون وفقًا لمايلي:
«السلام عليكم
مشكلة مع شركة فودافون اكتشفتها من اول شهر يوليو بدون حل لحد دلوقتي
فجأة اول الشهر رصيد المحفظة اتخصم و اتحول لمبلغ بالسالب
استنيت يوم يومين قولت مشكلة في السيستم و الدنيا هتظبط لكن محصلش
استخدمت محفظة تانية عشان اخلص و رجعت لموظفين الفرع و كان رد الموظفة قمة في الكوميديا أن دي نقطة مش علامة سالب و تقريبا كانت بتعاملني علي اني جاهل مش عارف افرق بين النقطة و السالب ! أو مش عارف الرصيد اللي معايا في حدود كام مثلا
و لما طلبت سحب الفلوس عشان اقنعها قالتلي رصيدك كده يبقي صفر اشحن عادي و هتشتغل معاك .. بعد ما كان رصيدي في نظرها حوالي 3 آلاف ! مش سالب 3 آلاف
المهم حولت 55 جنيه قولت احاول ادفع دولار واحد كتجربة و الحمد لله اني محولتش اكتر
الفلوس اتخصمت من الرصيد السالب و طبعا بدون اي استفادة
كلمتهم و عملت شكوي و فات ميعادها و بدون رد … كلمتهم بعد كده اكتر من مرة و بدون رد
هنبعت للادارة طلب و ترد عليه .. اللي اصلا مردتش علي الشكوي خلال ال 4 أو 5 أيام اللي حددوهم …. و لحد و31 اغسطس اخر ميعاد للرد علي الشكوي بعد ما زهقوا من اتصالاتي و حاطط كمان صورة رقم الشكوي
مليون اتصال و مليون طلب و مليون وعد بالاتصال من حد اعلي خلال 3 ساعات و حتي محدش بيتصل خلال الوقت و بفضل معطل نفسي منتظرهم
و السؤال هنا … ازاي محفظة مدفوعة مقدما ينزل عليها مديونية؟؟؟؟؟؟ و خدمة العملاء مش عارفين السبب ولا عارفين يقولوا ايه
و لو في سبب اصلا تبقي غلطة مين و انا بستخدم خدمة مدفوعة مقدما مينفعش يكون ليها رصيد بالسالب
و المفروض القصة دي تخلص امتي ؟ و تعطيل مصالحي ده و الخسارة دي ليها تعويض؟؟؟؟
Vodafone Egypt ليه الاستهانة بمصالح الناس؟ و فين الإدارة اللي خدمة العملاء بيبعتولها من شهر و نص؟؟و ازاي حاجة زى كده تحصل اصلا ؟ دي فلوس ناس مش لعبة
ياريت كله يحذر من فودافون و يخلي باله كويس اوي من رصيد المحفظة عشان مش هتلاقي فلوسك ولا هتلاقي حد يحل المشكلة ولا حتي عارفين هتتحل امتي أو ايه الحل أو حتي الطلب هيترد عليه امتي
الشكوي من يوم 15يوليو و كان آخر ميعاد 31 اغسطس بعد كل المواعيد اللي قالوها
و كان في موظف دمه خفيف اوي بيقولي الدولار ب 35 شوف النت .. علي اساس بشتري سوق سوداء ولا ايه مش عارف
ده غير اصلا أن عادي جدا رصيدك يزيد و يرجع ينقص تاني نتيجة خطأ في السيستم عندهم
قمة الإهمال و الفشل و مفيش رقابة ولا حساب علي الفلوس اللي بتروح دي».
وحاول محرر أوان مصر التواصل مع الشركة دون رد من الجهة المسؤولة. ،ويؤكد موقع أوان استعداده التام لتلقي اي رد رسمي من الشركة حول شكوى عميل فودافون.