حلت الفنانة سماح أنور، ضيفة ببرنامج «كلام الناس»، وتقدمه الإعلامية ياسمين عز، والمذاع عبر فضائية «MBC مصر»، وتتطرقت للحديث عن تفاصيل غيابها لفترة كبيرة عن الشاشة التلفزيونية وأسرار من حياتها الشخصية.
وكشفت الفنانة سماح انور عن ما هو سر حفاظها على وزنها رغم تناولها العديد من الاشياء مثل المانجا والبيتزا والمكرونة في منتصف الليل، مؤكدة ان السر هو تناولها وجبة واحدة فى اليوم .
وأضافت سماح أنور: «أنا باكل أي حاجة وبكل الكميات بس وجبة واحدة بس وده بسبب شغلي أنا اشتغلت وأنا عندي 16 سنة وفضلت حوالي 15 سنة باكل وقت البريك واللي هي الغدا».
وأشارت: «باكل واستنى 5 ساعات وبعدين أنام بس باكل مكرونات وبيتزا وممكن كيلو مانجا فص مثلاً، معنديش مشكلة، واحنا كـ شعب بنربط كل حاجة بالأكل يعني يلا نخرج يبقى هنروح ناكل فين، طيب تعالي عندي البيت ده أنا عاملة ليكي حلة محشي، حتى شهر رمضان اللي مفروض نريح بطننا فيه بنعمل سفرة عليها مليون صنف».
سماح أنور: لما بيقولوا عليا مسترجلة بفرح أوي
قالت سماح أنور: «الناس بتسألني هو إنتي ليه مسترجلة؟ هو ده اللبس.. الناس لما بتتفرج على عمل بتفتكر إن الممثل عامل كده في الحقيقة، أنا مفيش دور عملته بيمثلني لغاية دلوقتي خالص ومش هعمل كده، أنا بحب الاختلاف مع إني كسولة ولكن عندي أحلام وأفكار محدش بيفكر فيها كتير، بحب أشتغل على نفسي وبحب أخدم سماح أكتر، لأني مؤمنة إن محدش هيعرف يخدمك قد نفسك ولا هيعرف إمكانياتك قدك، مساندة الواحد لنفسه أهم من مساندة الناس».
وتابعت: «أنا اخترت أكون ممثلة، مينفعش يكون ده اختياري وأزعل من آراء الناس، أنا هتضايق لو الموضوع شخصي، ولكن دي مهنتي وده مش أنا، واللي بينقد دور أنا بستفيد منه كممثلة، واللي بيقول دي سماح مسترجلة بفرح أوي لأنه صدق الدور».
وأردفت سماح أنور كلامها قائلة: «هو مسترجلة يعني إيه بحلق دقني الصبح؟ تفسير الكلمة نفسها أنا مش فهماه، أنا ست رياضية وبحب السينما المختلفة».