أكدت الفنانة سماح أنور أنها لن تنزعج من نقد أفلامها أو من سؤال الجمهور عن تشبهها بالرجال في أعمالها، وذلك خلال لقائها مع الإعلامية ياسمين عز في برنامجها كلام الناس، الذي يتم عرضه على قناة mbc مصر.
حيث قالت سماح أنور: «الناس بتسألني هو إنتي ليه مسترجلة؟ هو ده اللبس.. الناس لما بتتفرج على عمل بتفتكر إن الممثل عامل كده في الحقيقة، أنا مفيش دور عملته بيمثلني لغاية دلوقتي خالص ومش هعمل كده، أنا بحب الاختلاف مع إني كسولة ولكن عندي أحلام وأفكار محدش بيفكر فيها كتير، بحب أشتغل على نفسي وبحب أخدم سماح أكتر، لأني مؤمنة إن محدش هيعرف يخدمك قد نفسك ولا هيعرف إمكانياتك قدك، مساندة الواحد لنفسه أهم من مساندة الناس».
وتابعت: «أنا اخترت أكون ممثلة، مينفعش يكون ده اختياري وأزعل من آراء الناس، أنا هتضايق لو الموضوع شخصي، ولكن دي مهنتي وده مش أنا، واللي بينقد دور أنا بستفيد منه كممثلة، واللي بيقول دي سماح مسترجلة بفرح أوي لأنه صدق الدور».
وأردفت سماح أنور كلامها قائلة: «هو مسترجلة يعني إيه بحلق دقني الصبح؟ تفسير الكلمة نفسها أنا مش فهماه، أنا ست رياضية وبحب السينما المختلفة».