كشف الفنان هشام المليجي، عن حقيقة ارتياطه ودخوله في علاقة عاطفية، مشيرًا إلى أن الزواج أمر صعب عليه.
وذكر هشام المليجي خلال لقاء له ببرنامج “كلام الناس”: موضوع الجواز كبير، وفي 3 إجابات جاهزين ممكن أقولهم ونكمل البرنامج، لكن لو هنتكلم بجد فالموضوع كبير، ومكنتش فاضي والله، ولسه بكون نفسي، ومفيش نصيب دي حاجة بتاعت ربنا، لأن في ناس أتجوزت وفي ناس متجوزتش، الموضوع عادي.
وواصل: الجواز ده في خطأ شائع أنه حب ولازم نكون حاجة معينة، ولكن هو اشتراك بين اتنين عايزين يعملوا أسرة، فلازم يكون الأفكار والأهداف متقاربة، الشكل مش مؤشر لحاجة، ولكن الناس اللي مروا في حياتي طلعوا عنيا وده عمل مخزون، وعشان الجواز مهم جدا لازم الواحد يأجله آخر حاجة في حياته.
اعتذار هشام المليجي لرانيا شاهين
وكان قد أعرب الفنان هشام المليجي، عن أسفه الشديد لصديقته الفنانة رانيا شاهين، بعد الهجوم الذي شنه عليها بسبب تصريحاتها عن مروره بأزمة نفسية نتيجة لندرة الأعمال المعروضة عليه.
وكتب المليجي عبر حسابه الرسمي بموقع التواصل الاجتماعي “فيسبوك”: “أنا متضايق من نفسي جدًا، لأني كنت عنيف مع زميلتي، اللي كانت عاوزه تساعدني، وغلطت في الأسلوب، ومش عارف أعمل إيه.. أخواتي وأقرب الناس ليا ميعرفوش دواخلي، ولا حياتي الشخصية، وأنا مطلبتش منهم مساعدة لأنهم أولى الناس بمساعدتي، ده لو كان عندي أزمة”.
وأضاف: “عشان كده أنا انفعلت، ومكنش المفروض أكتب وأنا غضبان، متزعليش مني يا رانيا، وحقك عليّا أنتِ عارفة إنك غالية عندي، وطول عمرنا جدعان مع بعض، وأنا بعتذر لك قدام الناس كلها”.