حلت الفنانة هدى المفتي، ضيفة ببرنامج «معكم»، المذاع على فضائية CBC، الذي تقدمه الإعلامية منى الشاذلي، وكشفت عن تفاصيل تعرضها لوعكة صحية شديدة عقب إصابتها بفيروس كورونا خلال الفترة الماضية؛ مما اضطرها للخضوع لعملية جراحية في الأمعاء.
وقالت هدى المفتي: «أنا من الناس اللي رجعوا من الجونة بكورونا، وكانت لسه الكورونا في الأول ومكنش حد لسة مش عارف ايه الأدوية ايه البروتوكولات، وكنت من أول الناس اللي يجيلها في مصر، وما كنتش عارفه إيه اللي يحصل».
وأضافت هدى المفتي، أنها شعرت بألم غريب مرة تلو الأخرى، ولم تكن تعلم ما الذي يسبب لها هذا الألم، قائلة: «وطبعًا ما أخدتش أدوية سيولة لما جاتلي الكورونا لأن حتى محدش قالي؛ فجالي جلطة في الوريد اللي بيوصل الدم للأمعاء، وما عرفتش، هو بس كنت بحس بأعراض معينة، وبحس بحرقان غريب، وكنت فاكره إن في حاجة في القلب عندي، وعملت رسم قلب، بس ما طلعش في حاجة».
وواصلت حديثها: «في رأس السنة، سافرت أنا وصديقتي لأسوان عشان نقضي وقت لطيف، وفجأة تعبت تعب مش طبيعي وجع مؤلم جداً وكنت بموت منها، ورجعت القاهرة بطيارة بسرعة، واتبهدلت، ولولا صاحبتي؛ كان حصلي حاجة، وهي كانت بتساعدني في كل حاجة».
واستكملت: «دخلت المستشفى في القاهرة، والدكاترة مش عارفين أنا عندي إيه، وعملت أشعة، وكل حاجة، ومش عارفين، وبطني بتتنفخ، ووجع وألم غير طبيعي، وقرروا يفتحوا بطني ولما فتحوا؛ طلع عندي جلطة في الوريد اللي بيوصل الدم للأمعاء، وبسبب إنه ما اتعالجش؛ عمل غرغرينة في جزء من الأمعاء».
وأكملت هدى المفتي: «فقررا يستأصلوا الجزء ده، وكانت عملية كبيرة، وفضلت فترة طويلة في العناية المركزة، أكتر من شهر، ومنعوا عني الأكل والماء 24 يوم، وكان ممنوع حد يدخلي غير أختي، وغصب عني من كتر الأدوية كنت بنسى مين الناس اللي برا دي، بس من وقتها وأنا علاقتي بربنا غير».