كشف الفنان شريف إدريس عبر صفحته الرسمية على موقع التواصل الاجتماعي أنه غير مسؤول عن توجهات جماعة الإخوان، مؤكداً وجهة نظره قائلًا: «معلش يا جماعه أنا بعتذر للجميع عن عدم ردي عالتليفون وانا الحمد لله كويس وبخير..بس فيه كام حاجه مهمه جدا عايز اوضحها..الناس اللي بتقولي شيل البوست علشان ولادك، انا مش محرج ولا مكسوف من اللي كتبته..واللي كتبته وحضراتكم مش قادرين تفهموه اني راجل بيحترم نفسه ومش قابل إهانه في شغلي اللي اتربيت فيه وولادي هيكبرو ويفهمو ده»
وتابع إدريس: «أنا ماقولتش اني فكرت أقتل عيالي انا قولت ان الضغوط اللي انا فيها وصلتني اني بحلم بكوابيس اني بقتل عيالي..واظن كلكم بتحلمو بكوابيس… عيالي دول هما كل حاجه في حياتي لا يمكن أأذيهم ولا أفكر أأذيهم، انا ماقولتش اعتزلت علشان أتوب..أتوب عن إيه مش فاهم انا شاركت من وانا عيل صغير في اعمال محترمه الكل بيحبها..وعمري ماشاركت في حاجه خليعه».
ورد الفنان شريف إدريس على منتقديه قائلًا: «الناس اللي واحده البوست باستهزاء وتقليل وعدم احترام..دول مايتردش عليهم ..اللي يستهزء في كرب بني أدم يبقي شخص عديم الإنسانيه، أيوه أنا بدور علي فرص سفر كويسه مش علشان بكره البلد انا بعشق تراب البلد دي أكتر من أي حد».
وصرح الفنان شريف إدريس عبر منشور له أن قناة الجيزة قامت بنشر المنشور الخاص به معلقاً: «ناس كتير بعتتلي ان قناة الجزيره مشيره البوست بتاعي..وصفحات الاخوان..ودي مش مسؤليتي وكل الناس عارفين موقفي الواضح تماما ضد الإخوان ..وكل الناس عارفين انهم بيصطادو في الميه العكره..والأهم ان انا كل كلامي واضح وصريح ومالوش اي علاقه بالسياسه ولا اتهمت الدوله ولا قولت مؤامره ولا قولت اي حاجه اصلا..دي ارزاق والارزاق علي الله وانا راضي بقضاء الله وقدره…الحمد لله، الحمد لله اني اخدت قراري وانا واقف علي رجلي وبصحتي لأن فيه. زملاء وصلو لمراحل صحيه صعبه ربنا معاهم ويشفيهم…فانا مش هستني يجرالي حاجه وابقي راقد».
واختتم الفنان شريف إدريس حديثه: «دعواتكم..انا الحمد لله كويس وبخير..وان شاء الله كله هيعدي..من كان رزقه علي الله فلا يحزن
تحياتي للجميع وشكراً ليكم ولمحبتكم».
شريف إدريس يُعلن اعتزاله التمثيل
من جانبه، أعلن الفنان شريف إدريس، عن اعتزاله الفن نهائيًا، مشيرًا إلى رغبته في السفر إلى بلد أخرى، بحثًا عن مصدر لكسب الرزق.
وكتب “إدريس” عبر حسابه الرسمي بموقع التواصل الاجتماعي “فيسبوك”: “بسم الله الرحمن الرحيم.. بعد ٣٥ سنه سعي وتعب وشقي في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد”.
وأضاف: “وده قرار أخدته بعد ما الامور وصلت في الوسط الفني لمرحله عبثيه وصلت اني بقيت بشوف بعض الزملاء بيشحتو الشغل علني علشان يشتغلو لان الشغل بقي متقسم علي ناس معينه..فلو الامور وصلت لكده ابعد احسن..وحتي لما بيجي شغل بيتفرض عليك توافق باقل الفلوس وتخرج من الشغل مديون..ومواقف مهينه زي ان شركة انتاج تعرض عليك اجر هو قيمة ربع اجرك والسبب انهم الميزانيه مصروفه عالديكور..طب خلو الديكور يمثل”.
وأردف شريف إدريس: “هحكيلكم موقف حصل معايا من اسبوع..اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور..كان هيجيلي جلطه بعد ماقفلت المكالمه ووافقت علشان انا محتاج اشتغل ومحتاج فلوس..وماقدرتش استوعب الفكره بصراحه اني بعد العمر ده مضطر ادفع علشان اشتغل فاتصلت واعتذرت…وده الحال حاليا ان الامور بقت في ايد كاستينج دايريكتور..وده موقف من مواقف كتير مريت بيها لو حكيتها محتاجه كتاب مش بوست عالفيس”.