حرصت الفنانة سماح أنور على الرد على هجوم الجمهور عليها بعد أن صرحت بأن الشعب يكره الفنانين وينظر لهم نظرة دنيئة، وذلك من خلال مقطع فيديو شاركته عبر حسابها الشخصي بموقع تبادل الصور والفيديوهات القصيرة إنستجرام مع الفنان أشرف زكي نقيب المهن التمثيلية.
وقال أشرف زكي: برحب بحضراتكم.. الفيديو بسجله من داخل مسرح نقابة المهن التمثيلية وبتشرفني النهاردة الفنانة الكبيرة سماح أنور.. الفيديو ده معمول عشان أستاذة سماح أنور عايزة توضح بعض الأشياء التي وصلت للناس بطريقة غير مقصودة.
وأضافت سماح أنور: بشكر حضرتك لوجودك جنبي في الموقف ده وسوء الفهم ده.. أولا شكرا لكل الناس اللي تفهمت موقفي ووقفت جنبي.. وبالنسبة للناس اللي فهموا موقفي غلط أحب أوضحلهم أنا ست مصرية طول عمري وأهلي مصريين، ومصر لها عليا كتير ومكنتش هبقى أي حاجة لولا مصر وشعب مصر.
وتابعت: كان عندي مشكلة شخصية تخص والدي ووالدتي الراحلين وعملت فيديو كنت منفعلة جدا تجاه الناس اللي تسببوا بالمشكلة دي واتفسر الفيديو بشكل غلط.. أحب أقول جملة واحدة بس معتقدش إن فيه أي جملة تانية تنفع بعدها.. مصر وشعب مصر خط أحمر.
وكانت قالت سماح أنور خلال بث مباشر لها عبر حسابها الشخصي بموقع التواصل الاجتماعي فيسبوك: الشعب بيكره الفنانين وبيشتمهم وبيبصلهم بصة دنيئة، وده مش بيهم الفنان لأنه بيبدع عشان يتبسط ويبسط الناس واللي مش سعيد بيهم يولع، إحنا كفنانين مش بنعمل الفن عشانك، إحنا بنعمله عشاننا إحنا وعشان خاطر موهبتنا اللي ربنا خلقنا بيها.
وأضافت: مهما الدولة عملت في البلد عشان ترتقي بيها مش هتعرف طول ما في ناس مش عايزين حاجة حلوة تحصل في البلد، وأنا بالنيابة عن أولاد الفنانين الراحلين برجو وزارة الثقافة تكمل في مبادرة عاش هنا، ولو جمهوري وقف ضدي مش عايزة جمهور.