نشر النجم تامر حسني بوست على موقع التواصل الإجتماعي ” فيسبوك” احتفالاً بعيد الأم على طريقته الخاصه ويوجه رسالة من خلاله لمتابعيه في هذه المناسبة.
وقال تامر حسني: جمعه مباركه يا أغلى الناس، النهارده بكتبلكم بوست عن الأم و نفسي من جوه قلبي تقروه من أخ لأخواته و ناتج من تجربه حقيقيه بيني و بين أمي هحاول اختصره لأن الكلام عن الام يحتاج كُتب كتير.
وأضاف: هبدأ كلامي بإن أكتر موقفين في عمري زعلت فيهم هما اللي كنت معاندها في الرأي و كل الناس كانت في كفه و هي لوحدها في كفه، اقسم بالله الأم بتشوف و بتحس اللي انت متعرفش تحسه، اوعى تقول انا خلاص كبرت و مش هاخد رأيها والله والله بيبقى عندك دليل و حد بيطمنك او بينبهك من مستقبل الموقف و أنت مش عايز تسمع و فاكر أن هي مش مواكبه الدنيا فهيكون رأيها راجعي تفتكر ربنا هيخلق قلب أم له فترة صلاحيه يعني بيحس لفتره محدوده !!!؟ أكيد لا مركز احساسها ممدود لآخر العمر في حاجه جواها بتقولها يا اأه يا لأ صدقوها.
وتابع: افتكر مره زمان أمى فضلت تقولي على واحد صاحبي انه مش كويس و غدار و حقود انا فضلت اقولها حرام عليكي دا أحسن واحد في صحابي و أدافع عنه باستماته لحد ما الأيام دارت و فعلاً خرج منه الجرح الكبير و الحقد الكبير اللي ميطلعش من إنسان بيكرهني أصلاً و عرفت ساعتها أن في ناس حوالينا لابسين قناع الحب لحد ما المصلحه هتروح و بعدين يبان وشهم الحقيقي فعلمت نفسي متعشمش أوي في الناس عشان لما يغدروا متعبش أوي و الناس الطيبين بجد أكيد هيبانوا و يبهرونا بحبهم و ثباتهم الطويل اللي مش مشروط ولا قائم على مصلحه يعني برضو مش هنظلم حد كويس بس هنلغي فكرة التسرع في العشم الزائد.
وأشار: هاجي بقى لنقطه نفسيه غريبه انا كل ما تكون ايد امي على راسي والله والله والله بحس لو تعبان اني مرتاح لو مهموم اني مبسوط وكأنها بتشفط و بتسحب اي طاقه سلبيه مش كويسه و تحطلي طاقه جميله كلها خير و راحه، الايام اللي غصب عني مش بعرف اشوفها فيها بكون متوتر قلقان و لما بشوفها بقول في سري انا بحمد ربنا عشان اتولدت لقيت الست دي امي.
وتابع: يلا نوريهم قد إيه بنحبهم و اللي مزعل اهله يروح فوراً يصالحهم يلا عندك سبب جميل أهوه جه من عند ربنا متخافش روح صالح ربنا هيكون معاك و هيخليك مجبور الخاطر صدقني، و اكيد اتمنى لو يفضل ده شكل علاقتنا بيهم طول الحياه مش بس في عيد الام، كل سنه و انتي طيبه يا أمي.
رغم الطلاق.. تامر حسني يصل الود بـ بسمة أوسيل في عيد الأم
وأختتم حديثه: كل سنه و انتي طيبه يا بسمه و كل سنه و والدتك الجميله طيبه، انا كل يوم يا بسمه بحكي لولادنا عن الأصول دي و مصورلهم كل تعبك معاهم من وانتي لسه، هعدي عصبيتك عليا في الوقت ده مش مشكله حقك، المهم مصورلهم مجهودك لحظه بلحظه عشان يعرفوا انتي و أنا تعبنا عشانهم إزاي و لما يكبروا ان شاء الله هما يعملوا كده مع ولادهم.
وأضاف، كمان يراعوا ربنا فينا لما احنا نكبر أوي، إن شاء الله هتشوفي فيهم كل الخير عشان انتي أم جميله و مخلصه ليهم قدام ربنا، كل سنه و كل أم في الدنيا طيبه و يلا ندعي لكل أم مش معانا ربنا يرحمها و يرفع من قدرها في الجنه.