حرصت الإعلامية بسمة وهبة، على تقديم الدعم للفنانة شيرين عبد الوهاب، وذلك بعد أزمتها الأخيرة مع زوجها الفنان حسام حبيب، وانفصالهما.
بسمة وهبة تدعم شيرين عبد الوهاب
وذكرت بسمة وهبة خلال تقديم برنامجها 90 دقيقة، الذي يعرض عبر فضائية “المحور” قائلة: شيرين ست حساسة عايشة بفطرتها وسجيتها واتكلمت وحكت عن زعلها الشديد على قد الحب اللي جواها، واعترفت أنها تحبه.
وواصلت: أحب أقولكم كمان حسام بيحب شيرين، ومش معنى إنه مطلعش يتكلم عن اتهامات البعض له من الناس اللي بتزيط في الزيطة يبقى كلامهم صح، وحسام يقدر يدخل في أي وقت، لكنه مش عاوز مشاكل عشان بيحب شيرين وعاوز يسيب لشيرين مساحة تطلع اللي جواها.
وأردفت بسمة وهبة: ليه نحكم على هذا الحب بالإعدام ونتسرع ونقول إنها مينفعش ترجع وكل واحد يقول رأيه ولو إحنا بنحب شيرين ونقولها خدي وقتك وواجهي مشاكلك واقعدي معاه، انتي ياما أحاسيسك ومشاعرك وصوتك صالحوا ناس على ناس.
بسمة وهبة تدعم شيرين عبد الوهاب
وتابعت: من حق شيرين علينا النهاردة نقولها شوفي سعادتك فين وبلاش نفتح المواضيع ونكبرها عليها، وعاوز إنك ترتاحي أعشقك وعاوزاكي تفكري وتسألي نفسك عن الحاجات الحلوة منه تجاهك يمكن حسام عنده ظروف ويمر بظروف نفسية زيك.
واستأنفت: خدي قرارك بعيد عننا، بلاش تاخدي من حد نصايح، لا ولا الجمهور ولا المحيطين بيكِ اسمعي إحساسك ومشاعرك انتي، انتي أكتر واحدة تقدري تحكمي على مشاعرك، وحلق شعرك أقوى قرار شجاع لأنثى على وجه الأرض، واوعي تفتكري إنك لما تعيشي من غير الإنسان اللي هتحبيه هتكوني مبسوطة.
وأختتمت بسمة وهبة قائلة: ممكن تبقي مرتاحة بس مش هتكوني سعيدة، ومتسمعيش كلام حد واسمعي كلام قلبك وساعتها ممكن تحصل المعجزة اللي قلتي عليها وارجعي لحسام حبيب لأن محدش بيفرح في الخراب ولما هتفتحي معاه صفحة جديدة محدش هيحاسبك.