تعرضت الإعلامية ميار الببلاوي لوعكة صحية عقب نشرها بث مباشر لها عبر حسابها الرسمي موقع “فيس بوك” وتحدثت من خلاله عن الداعية محمد أبو بكر وتعليقاته على ما صدر منها في برنامج العرافة مع الإعلامية بسمه وهبة بخصوص زواجها 11 مرة.
وكشفت “الببلاوي” عن حالتها الصحية من خلال تصريح خاص لـ “أوان مصر” قائلة: “أنا ربنا هيجبلي حقي”.
وأضافت، إن الله يدافع عن الذين آمنوا للذين هم يقاتلون، موضحة أنا تعبانة وممنوعه من الكلام ومبعرفش أكلم من غير جهاز تنفس صناعي، المفروض أتحجز في المستشفي من أسبوع ولكن أنا رافضة أتحجز.
أزمة ميار الببلاوي
تصدرت الإعلامية ميار الببلاوي التريند في الساعات الماضية، عقب ظهورها في بث مباشر على صفحتها الخاصة بموقع «فيسبوك»، وروت ميار الببلاوي عن موقف جمعها بالشيخ محمد أبو بكر.
قائلة: «لو سمحتوا كرامة لرب العالمين، لو في يوم من الأيام ولو سمعتوا مني كلمة غيرت في حياة حد أو آية افتكروها ليا، وكل اللي طلباه منكم الدعاء، أنا سكت كتير لأني دايما أؤمن بحديث الرسول أميتوا الباطل بالسكوت عنه، لكن أنا تعبت وكل حاجة يقولوا علشان التريند بس أنا مش فارقة معايا التريند، وأنا عيانة بقالي 8 أيام ومش بقول أني عيانة ولا بتكلم علشان محدش يقول إني بتاجر بالعيا وزهقت من كلمة التريند بعد ما كنت بصور لكم كل حاجة ولما أعمل أي حاجة أقولها».
متابعة: «والنهارده حصل حاجة عمري ما تخيلتها، أول ما خلصت الهواء صاحبتي كان عندها حاجة في قناة معينة وما رضتش أسيبها لوحدها وقلت هروح معاها وأسلم عليها، وأنا داخلة أنا ورئيسة التحرير بتاعتي لقيت الشيخ الفاضل، وبحتسبه من الشيوخ الأجلاء ولكن سبحان الله يمكن نزغ شيطان أو فتنة أو حديث نفس».
مستكملة: «ربنا بيقول يا أيها الذين آمنوا إن جاءكم فاسق بنبأ فتبينوا فما بالكم إن اللي قال عني كده شيخ جليل ويخوض في عرضي وشرفي رغم أن كلنا بنحبه وبنسمع كلامه، وأول ما شيخنا الجليل شافني وأنا كنت بحبه جدا وبتابعه وأقول نفسي يكون معايا في حلقة، وسلمت عليه وقالي إنتي جيالي علشان حطيتك على المرجيحة امبارح فقلت له مش فاهمة، فقال لي أصل إمبارح كنت جاي عليكي جامد، فرديت قلت له شرف ليا وأنت عمرك ما هتظلمني ونحسبك على خير، لقيته بيقول لي اللي أنتي قلتيه مع بسمة، لكن ما حدش فكر أنه معمول مونتاج علشان يطلع تريند ونص الكلام مقطوع».
مضافة: «ولما سمعت الفيديو لقيته بيقول عليا إني باخد كل راجل ليلتين وإني ببوظ شكل الدعا، حسبي الله ونعم الوكيل فيك زي ما اتكلمت في عرضي وشرفي وشرف ابني، حرام عليك سبت التمثيل وكل حاجة وبشتغل في برنامجي وبين صلاتي وبيتي وتربية ابني ومش عايشة ومش بخرج من بيتي إلا لو شغلي يعني دفن نفسي مع أمي».
مختتمة: «المأساة بدأت من حلقة العرافة مع بسمة وهبة، وسيبكم من اللي حصل في الحلقة، لكن أي حد بيقول أي حاجة عادي بتعدي لكن ميار لو فتحت بقوها الناس كلها تسن عليها السكاكين ومحدش فكر أني ابني راجل وابني في وسط الرجالة وصحابوا وشغله شكله هيكون إيه، وابني مش بيكلمني من 22 رمضان من وقت ما الحلقة طلعت وقافل على نفسه اوضته ومش بيكلمني وانا ما طلعتش غير بابني…. أنا بنت ناس وشريفة ومش محتاجة لراجل يصرف عليا ومن عيلة ورجالة وصعيدية وناس ميعرفوش غير الشرف، وأنا وكلت المحامي الخاص بها لرفع دعوى قضائية على الشيخ محمد أبو بكر .