حرص الفنان تامر حسني، على توجيه رسالة خاصة إلى جمهوره ومحبيه؛ بسبب الأوضاع التي تمر بها المنطقة العربية خلال الفترة الحالية، والحرب المشتعلة بين شعبنا الفلسطيني، والكيان الصهيوني الإسرائيلي، والفيديوهات المنتشرة لاستشهاد عدد كبير من الفلسطينيين، وهدم حياتهم ومبانيهم.
ونشر تامر حسني، عبر صفحته الشخصية بموقع التواصل الاجتماعي “فيسبوك” منشورًا كتب فيه: “في الوقت ده ناس كتير إيمانها بربنا ممكن يتزعزع أو ينهار و يقولوا طب ربنا فين؟ مش هرد بالآيات والأحاديث عشان في ناس احق مني يتكلموا بلغة الدين بس أنا هرد رد بسيط من واقع الدنيا.. انت لو دخلت فيلم و جالك تليفون فاستعجلت ومشيت في ربعه الأولاني هل تقدر تحكم على نهاية الفيلم أكيد لأ يعني متحكمش على حاجه لسه مش خلصانة”.
وأضاف: “طيب الدنيا لسه شغالة مخلصتش يعني متعرفش بكرا ربنا شايل إيه متستعجلش و تحكم على الدنيا وانت لسه مشوفتش مرحلة النصر اللي ربنا وعد بيها أصلاً في قرآنه.. متحكمش دلوقتي حكمك هيكون غلط احنا لسه مكملناش الدنيا للآخر.. يمهل ولا يهمل.. واللي راحوا دول جريوا على الجنة اللي هي الحياة الأساسية، حياة الخُلد راحوا دار الحق و مشيوا من دار الباطل”.
وتابع: “يا جماعه الدنيا دي ولا حاجة دي دار باطل فيها الشر والكره و الحقد والظلم.. لكن الناس دي راحت لحياة كلها حب وخير وسلام وفرح ولما في الآخرة نشوف كل حد كانت حياته صعبة و مليانه معاناة ازاي ربنا كافئه على صبره و تحمله من كل اللي شافه وكرمه بأجمل نعيم الجنه هنقول “ياريتنا كنا احنا” الصبر يا جماعة والثقة في وعد ربنا”.
واستطرد تامر حسني: “الدنيا دلوقتي وسكان الأرض انقسمت ٢.. ناس إيمانهم راح و ناس اتمسكوا بعقيدتهم أكتر ودول أول ناس كسبوا معركة الدنيا.. ثقوا في كاتب الدنيا العظيم إنكم لازم هتسقفوا في النهاية من حلاوة نصره وهو بينصر المظلوم بمعجزة من عنده تتحقق في الوقت المناسب.. اللي يعلمه هو مش إحنا والله والله والله لازم يبقى معندناش شك نهائي في رحمته و فضله، اكسبوا المعركة يا جماعه أوعوا إيمانكم بربنا يتهز احنا كلنا اصلاً عايشين في اختبار و لازم ننجح فيه.. إن شاء الله هتشوفوا بعنيكم أكبر رد من ربنا كما وعد في قرآنه الكريم “ثقوا في الله” إن وعد الله حق”.