كشف الفنان إيهاب توفيق، تفاصيل عن حياته الشخصية، كما أوضح انه يحب السهر كثيراً، وجاء ذلك خلال لقائه مع الفنان أمير كرارة ببرنامج “سهرانين، الذي يعرض عبر قناة “أون” الفضائية في تمام الساعة 9:30، يومي الاربعاء والخميس.
إيهاب توفيق يكشف كواليس حياته اليومية
وصرح قائلاً: “ممكن أفضل سهران لفترات طويلة وممكن أقعد لتاني يوم الصبح الساعة البيولوجية بتاعتي باظت من زمان بسبب السفر كثيرا”.
وتابع قائلاً: “وتغير مواعيد الليل والنهار في مختلف الدول التي كنت بسافر لها في فترة صغري كانت مواعيد نومي مظبوطة ولما كانت تيجي الساعة 7 بليل كان لازم انام فورا”.
إيهاب توفيق يكشف كواليس كليب داني
كما كشف المطرب المصري إيهاب توفيق، كواليس كليب “داني”، قائلاً: “سجلنا الأغنية وكسرة الدنيا، ومحدش عارف إني أنا اللي بغني الأغنية،ووقتها كان الشريط عليه اسم الشركة واسم الألبوم، وحميد الشاعري، وحنان، وعلاء عبد الخالق، ومصطفى قمر وأنا، واللوجو بتاع الشركة، كل ده على شريط أصغر من الكف”
وواصل: “صورتي كانت طالعة حاجة صغيرة جدا، وبقيت ماشي سامع الأغنية في كل مكان ومحدش عارفني، ومكانتش موضة ولا حاجة الموضوع كان كوميدي جدا”.
وأردف: “كان المفروض مفيش حاجة تخلي الأغنية تتذاع في التليفزيون غير لازم تصورها، ولا كان في فيديو كليب ولا حاجة، وكنا بناخد معاد معين ونروح نستنى مخرج التليفزيون بالدور، والحل الوحيد إن التليفزيون ياخد المطربين كلهم الموجودين وقتها، ونروح مثلا حديقة الأندلس أو نادي الشمس وكله يصور هناك، ويمكن جنب نفس الشجرة، وشوية يلعبوا كرة قدة وشوية يلعبوا طايرة”
واختتم: “هو ده اللي كان متاح عشان الأغنية تتذاع في البرنامج اللي كان بيتعرض كل أسبوع، واتصورت الأغنية بالشكل ده، وكانت فرحة شديدة جدا إن إحنا طلعنا في التليفزيون، على الأقل يشوفوا شكلي وسط اللي بيلعبوا كورة.”