كشف المطرب المصري إيهاب توفيق، كواليس كليب “داني”، وذلك خلال استضافته ببرنامج سهرانين، الذي يقدمه الإعلامي أمير كرارة، عبر فضائية ON.
إيهاب توفيق في ضيافة أمير كرارة
وذكر إيهاب توفيق قائلاً: سجلنا الأغنية وكسرة الدنيا، ومحدش عارف إني أنا اللي بغني الأغنية،ووقتها كان الشريط عليه اسم الشركة واسم الألبوم، وحميد الشاعري، وحنان، وعلاء عبد الخالق، ومصطفى قمر وأنا، واللوجو بتاع الشركة، كل ده على شريط أصغر من الكف.
وواصل: صورتي كانت طالعة حاجة صغيرة جدا، وبقيت ماشي سامع الأغنية في كل مكان ومحدش عارفني، ومكانتش موضة ولا حاجة الموضوع كان كوميدي جدا.
إيهاب توفيق يكشف كواليس كليب داني
وأردف: كان المفروض مفيش حاجة تخلي الأغنية تتذاع في التليفزيون غير لازم تصورها، ولا كان في فيديو كليب ولا حاجة، وكنا بناخد معاد معين ونروح نستنى مخرج التليفزيون بالدور، والحل الوحيد إن التليفزيون ياخد المطربين كلهم الموجودين وقتها، ونروح مثلا حديقة الأندلس أو نادي الشمس وكله يصور هناك، ويمكن جنب نفس الشجرة، وشوية يلعبوا كرة قدة وشوية يلعبوا طايرة.
واختتم: هو ده اللي كان متاح عشان الأغنية تتذاع في البرنامج اللي كان بيتعرض كل أسبوع، واتصورت الأغنية بالشكل ده، وكانت فرحة شديدة جدا إن إحنا طلعنا في التليفزيون، على الأقل يشوفوا شكلي وسط اللي بيلعبوا كورة.