كشفت الفنانة يسرا عن تفاصيل مسلسل 1000 حمدالله على السلامة، والذي حقق نجاحًا ساحقًا بعد عرضه في السباق الرمضاني 2023.
وقالت يسرا في مداخلة هاتفية في برنامج «الحياة اليوم»، الذي تم عرضه عبر شاشة قناة «الحياة»: أنا مكنتش عايزة أعمل أي حاجة غير إني أرسم البسمة على وشوش الناس، وده اللي أنا قُلته لأستاذ جمال العدل، حبيت أعمل حالة حلوة للناس كلنا محتاجين ضحك وفرفشة، وأنا كنت محتاجة أعمل ده عشان أغيّر من جلدي.
وتابعت: أنا حقي كفنانة وممثلة إني أغير من جلدي ومقعدش في قالب واحد وأنجح في أي توب ألبسه، ده في حد ذاته تحدي كبير جدًا ليا، إحنا جبنا 100 مليون على التيك توك وعمري ما تخيلت ده في حياتي، وإننا نوصل لرقم قياسي زي ده عمرها ما حصلت، وقدرت أوصل لكل الناس.
وأما عن رأيها في النجوم الشباب في أعمالها الفنية وبالأخص مسلسل 1000 حمدالله على السلامة، حيث قالت يسرا: أنا فرحانة بيهم جدًا الشباب موهوب جدًا، وأنا مكنتش أعرف عنبة قبل ما نشتغل ولكن أنا فرحانة بيه جدًا وعنده قبول غير عادي ويدخل القلب.
وأضافت: آدم الشرقاوي أنا بعشقه من وقت مسلسل لعبة نيوتن وكنت هتجنن عايزاه معايا في مسلسلي، ومايان السيد موهوبة جدًا وبتمسك الشخصية صح، وأحمد عبد الوهاب ده من ورا العقل وعنده حضور غير عادي.
وواصلت: أتذكر إن عمري ما بطلت أدفع بالنجوم الشباب من يوم ما بدأت، بداية من مسلسل أين قلبي قدمت منة شلبي ومي عز الدين، ومسلسل ملك روحي قدمت أحمد عز، وطبيعة المهنة أجيال بتشيل أجيال، وحقهم عليا إني أديهم فرصة يستحقوها.
مسلسل 1000 حمدالله ع السلامة
يشارك في بطولة مسلسل 1000 حمدالله ع السلامة، عدد كبير من نجوم الفن، أبرزهم يسرا، ومحمد ثروت، وشيماء سيف، ومايان السيد وأدم الشرقاوي وأوتاكا وضيف شرف بيومي فؤاد وعنبة، والعمل من تأليف محمد ذو الفقار، وإخراج عمرو صلاح.