وجود مدير سهل تتواصل معاه،سهل تطلب منه مساعدة، سهل تحكيله وتشتكيله وتكلمه وتراضيه وتعتذرله ..
سهل تختلف وتتناقش معاه ، وتحبه وتقدره وتحترمه..
وقتها هتطلع أحسن حاجة عندك في الشغل ، هتبدع وتطور من نفسك ، عشان عارف ان مديرك شايف نجاحك نجاحه ، عشان مديرك جدع و محترم و شاطر و مقدرك..
أهم حاجة يجي نصيبك في مدير كويس لأن المديرون أنواع منهم السوي ومنهم غير السوي ،
السوي اللي بيتمتع بصفات القائد و يقدر يجمع فريق العمل دايماً ويشاركهم النجاح، اما غير السوي فده بيعاني من اضطرابات نفسية، بيبقى ليها أثار على المرؤوسين وعلى الشغل نفسه ، و للتعامل مع الانواع دي من المدراء ، لازم يكون لكل شخصية منهم تعامل مختلف عن الاخر بشكل يتناسب مع بيئة العمل ..
فالمدير اللي بيحتاج للمديح دايماً ، لازم ينتقد بشكل بسيط لو صدر منه أمرا يسيئ لمصلحة العمل، لأن الانتقاد له أصول،مع الالتزام بالتوازن بين المديح والنقد دايماً.
أما لو جه حظك مع المدير المتسلط ، فده لازم تتعامل معاه بشكل وسطي ، عشان متعملش منه طاغية ، ومتقللش منه عشان ميبقاش في رد فعل صادم منه يوجعك نفسياً أو مادياً ..
أما المدير المتوتر وغير الواثق من نفسه فده بأة بيكون مشكلة كبيرة لكل اللي حواليه ، ده لازم يتعامل معاملة الأطفال، و العلاقة دي من العلاقات الصعبة جداً خاصة أن مصادر التوتر لا يمكن السيطرة عليها فبالتالى لازم تلاقي وسيلة عشان تهديه وتقوي ضعفه عشان تساعده ياخذ القرارات بشكل سليم وصحيح ، وإذا الموظف ملقاش حل للمشكلة الفعليه ، هنا للاسف لازم تغير الادارة اللي بتشتغل فيها و تروح مكان تاني تحقق فيه ذاتك و طموحاتك.
ولو حظك وحش اوي بأة وقافل ، هتقع في إيد المدير المزاجي ، متقلب الانفعالات ، يزعل منك تبقى عدوه ، ولازم تبعد عنه وتلتزم السكوت ، ومينفعش تضغط عليه فى الوقت ده ، أما وقت ما بيكون مزاجة رايق ، تقدر ساعتها تناقشه فى الشغل وفي احتياجات العمل ، فإختيار الوقت الصح هو الحل الأمثل و مفتاح النجاح في التوقيت المناسب للشخصية دي .
ولسة في انواع تانية كتير منها اللي يعليك و منها اللي يهد أحلامك ويكسر شغفك بشغلك وطموحك، ومن هنا بقترح للمرة المليون أننا لازم نضيف إختبارات نفسية للسادة المرشحون للمناصب القيادية و الادارية ، زي ما في إختبارات عملية و برامج تدريبية لازم يتم إجتيازها للوصول للمناصب دي، عشان نخلق صف تاني وراهم سليم نفسياً يقدر ينتج ويعمل في بيئة عمل مريحة، ويبقوا أساس وضهر للجيل اللي بعدهم.
اللي قال أن الشغل مفهوش مشاعر ضحك علينا، الشغل منظومة مشاعر إنسانية عظيمة فيها المدير السهل اللين اللي تتعلم منه و تحبه وتحترمه وتعمله حساب وتحسه جبل ورا ضهرك ساند عليه دايماً وانت مطمن…
————
بقلم: ياسمين دسوقي
مدير عام مساعد التدريب بشركة بتروسيف – قطاع البترول و الثروة المعدنية و عضو المجلس القومي للمرأة بالقاهرة