كشفت الفنانة منال سلامة عن علاقتها بابنتها الممثلة الشابة أميرة أديب، وطرق تربيتها لها واعتمادها على نفسها طوال الوقت، وذلك خلال حوارها مع برنامج “الراديو بيضحك” الذي تقدمه الإعلامية فاطمة مصطفى عبر إذاعة “الراديو 9090”.
وقالت منال سلامة: أميرة بقت مشهوره أكتر مني، هي شاطرة وموهوبة وعملت كل حاجة من نفسها ومن صغرها متعبتنيش.
وتحدثت منال سلامة عن اولادها أميرة وعلي وطريقة تربيتها لهما، حيث قالت: لما درسوا برا مصر كان مصروفهم محدود جدا، كانوا بيشتغلوا وهما طلبة، ابني كان بيشتغل بيقطع شجر ويشيله، وأميرة كانت بتنزل تعلم رقص وتاخد 50 جنيه.
وأضافت: أنا أبويا رباني على أني إنسان مش بنت، مفيش فكرة الولد والبنت، أنا كنت البكرية وكان بياخدني معاه على القهوة، أنا تربيت بكره كلمة راجل أنا إنسان، وربيت أميرة وعلي على كده، اتربوا على نفس القيم والمبادئ، أميرة بتسافر بالشهر وتقعد في أماكن بـ3 دولار في اليوم، مرة حجزت في مكان واتنصب عليها ونامت على البحر.
وواصلت منال سلامة: أميرة بتحب السفر في حاجات بتجهزها وحاجات بتسافر على باب الله، أنا سيباها تعتمد على نفسها أنا بربيها على أني مش عايشالها طول العمر، وأنا ربيتهم يعيشوا في مستوى بسيط ومستوى عالي، يقعدوا على الطبلية ويتعاملوا مع الناس بمنتهى البساطة ولو تواجدوا في مكان 7 ستار تتعامل بنفس الطريقة.