حكى الفنان محمد رياض أنه رفض مسلسل «الضوء الشارد» 3 مرات، مؤكداً أن السبب يرجع لـ وفاة شخصية «فارس◄ التي قدمها، قبل أن يقتنع أخيرا ويقدمها.
وقال محمد رياض خلال لقائه في برنامج «الراديو بيضحك» من تقديم الإعلامية فاطمة مصطفى، عبر إذاعة «الراديو 9090»: «ذكرياتي عن المسلسل اللي فاكرها إني مكنتش هشتغله، رفضته 3 مرات، أول مرة كلمني عليه أستاذ محمد صفاء عامر، ولما شوفت الورق لقيت (فارس) بيموت في الحلقة 16 والمسلسل 33 حلقة رفضت، قالي محدش هيعمل الدور ده غيرك».
محمد رياض عن دوره في الضوء الشارد: صناع العمل جريوا ورايا كتير وأنا رافض
أضاف: «هو وأستاذ مجدي أبو عميرة كانوا متمسكين بيّا جدا، قولتله ليه الشخصية تموت بدري؟ زود دوري إن كنت عايزني، قالي طيب خلاص هروح إسكندرية هكتب، قولتله حتى لو هيموت في الحلقة قبل الأخيرة مثلا لكن ميموتش في نص الحلقات، رجع قالي معرفش أكتب ولا مشهد تاني للشخصية دي، وهما جريوا ورايا كتير جدا وأنا رافض».
تابع: «أنا كنت عايز أعمل الدور جدا، بس كنت خايف جدا الناس تنساني بعد ما أموت في المسلسل، لكن أنا راهنت على الدور وربنا أكرمني وكسبت الرهان قدام نفسي، والدور كان من الحاجات المهمة اللي قدّمتها في حياتي، وفي ناس كتير في الصعيد سمت (فارس) على اسم الشخصية، السنة بتاعته اسم (فارس) كان تريند بسبب المسلسل».