كانت جيهان عبد المنعم، شقيقة الفنانة الراحلة سعاد حسني، ضيفة الإعلامية منى الشاذلي في برنامجها معكم، الذي يتم عرضه عبر شاشة قناة ON، وكشفت خلال الحلقة أسرار عن عن حياة السندريلا الشخصية .
أبرز تصريحات شقيقة سعاد حسني
ويستعرض لكم موقع أوان مصر خلال السطور التالية، أبرز تصريحات شقيقة سعاد حسنى:
سعاد حسني وعبد الحليم حافظ كانوا متجوزين 6 سنين ونص، وكان بيروح عندها البيت وتروح عنده.
عبد الحليم كان عارف إن إخوات سعاد حسنى مهمين عندها، فكان بيعاملنا زي ولاده، ويشيلني أنا وأخويا جلاء على رجله وإحنا صغيرين.
حسني والد سعاد حسني تزوج واحدة اسمها لطيفة وأنجب 8 أبناء بينهم نجاة، وبعدها تزوج من جوهرة أمي، وأنجب 3 بنات سعاد، وكوثر، وصباح.
بعد طلاق أمي من حسني، تزوجت من والدي عبد المنعم، والثلاث بنات عاشوا معانا، وسعاد حسني هي من ربتني، وأنجب والدي 6 أبناء كلهم تبدأ أسماؤهم بحرف الجيم ومنهم جنجاه.
فيلم الزوجة الثانية حصل فيه موقف، عمدة القرية اللي صوروا فيها الفيلم هيأ لهم كل حاجة لإنه كان عايز يتجوزها.
سعاد حسني كانت ساعتها متجوزة، وكانت دمها خفيف فقالت للعمدة نخلص الفيلم وبعدها نشوف، لكن صمم يتجوزوا قبل ما فريق العمل يمشي.
العصب السابع أصاب سعاد حسنى بسبب المروحة والمكيف، وفجأة صحيت لقت في كسرة في عينها وإتخضت، وللأسف أهملت العلاج والدكتور كتب لها كورتيزون.
العلاج بالكورتيزون تسبب في زيادة وزنها، وبدأت تعاني من آلام الظهر بالإضافة إلى تآكل الأسنان، وتضايقت لأنها تحتاج تعبيرات العين والوجه في التمثيل.
بعد مشاركتها في فيلم الراعي والنساء قررت تختفي عن الأنظار، وحتى الفيلم عملته مجاملة للمخرج علي بدرخان .
رفضت تاخد فلوس من حد وسافرت تتعالج على حسابها، لكن رئيس الوزراء الأسبق كمال الجنزوري قال لازم تتعالج على نفقة الدولة.
جنجاه أختنا حاطة إثباتات كتير عن مين اللي قتل سعاد حسني في كتاب كتبته، والقضية اتقفلت في لندن في حاجات حصلت كتير هناك مش صحيحة، والأسرة متأكدة وعلى قناعة إن سعاد قُتلت.
أنا كتبت قصة حياة سعاد حسنى في 3 سنين ونصف، ووحيد حامد تحمس وقال يشرفني أعملها، ولازم تكون ممثلة جديدة عندها روح سعاد حسني ومش لازم تكون شبيهة لها في الشكل، لكن توفى قبل تقديم العمل.