تحدث الفنان لطفي لبيب عن رحلته مع حرب أكتوبر، قائلًا: «كان ميلاد قاسي جدا عشان رحلة الفن رحلة طويلة ابتدتها في معهد فنون مسرحية مع زملائي خريجي سنة 70 منهم نبيل الحلفاوي ومحمد صبحي وهادي الجيار ويسري مصطفى وسامي فهمي، وكان عليا أن أبدأ من الأول خالص، واستقبلت كل الفنانين وأنا في الجيش كانوا بيصوروا في الكتيبة بتاعتي منهم أبناء الصمت وولا فيلم منهم بيعبر عن حقيقة اللي حصل في حرب اكتوبر».
وتابع لطفي لبيب، خلال لقائه في برنامج أنا والقناع، التي تقدمه الإعلامية منى عبد الوهاب، عبر شاشتي قناة الحياة، وسي بي سي: «يمكن أبناء الصمت شوية وبينتهي بنصر أكتوبر، ببتدي بالعبور ونشوف اي الدنيا وللاسف متعملش فيلم عن حرب أكتوبر ولا تعبر» .
وتحدث لطفي لبيب عن مواقف طريفة في الجيش، حيث قال: « كانوا بيسألوني مبصليش معاهم ليه واكتشفو إني مسيحي، مصر كانت مختلفة أنا دخلت في 70 وطلع في أواخر 75 6 سنين قاعد في حفرة قبل ما أدخل كانت مصر غير، ومكنش فيها مسيحي ومسلم لكن بعد ما طلعت الحياة اتغير والحرام كتر والحلال حاسب وخلي بالك».
وتابع: «صديق عمري كان الشيخ عبد الفتاح صقر إمام مسجد واتشكلت مننا جماعات دفن شهداء» .
وكشف عن لحظات استشهاد العميد أحمد حمدي، قائلًا: «الشهيد أحمد حمدي استشهد قدامي كان بيجري هو روجالته عشان يعملوا كوبري والتيار كان جامد واتعرض لدفعة طيران الرجالة اللى معاه قالوا استشهد العميد أحمد حمدى وكملوا الكوبرى فى لحظات بعد انتهاء الكوبرى بدأت العربيات والدبابات تعدى ومعدات برمائية تعدى القناة والوطن كان غالى جدا خلال الحرب».
وتابع لطفي لبيب:« الحرب ادتني قوة وإرادة وصلابة وإصرار ومتابع كل صحابي اللي معايا في الحرب وكل شوية أتلقى تليفون فلان رحل، ومن المواقف اللي قابلتني سيد عبد الرازق نزل خد دفعة رشاش مقالش أه قال حد ياخد مكاني يجماعة وبعدها استشهد، وأخويا إكرام الأسرى قالوله عايز تقول حاجة قالهم أرجوا إن أخويا لطفي يكون بخير بس».
واختتم لطفي لبيب كلامه، قائلًا: «إحنا عايشين في أحلى دولة والمحبة أساسية في الحياة نحب بعض هتلاقينا زي الفل لكن فيه ازمة خيال لو بصينا لكتاب المسرح زي عبد الرحمن الشرقاوي وصلاح عبد الصابور وغيرهم كوكبة من العظما النهاردة فين؟، وأنا بكتب موضوعات جميلة تقلم أظافر الوحش داخل الانسان».