هاجمت المخرجة كاملة أبو ذكري، الفنان بيومي فؤاد وذلك بعد تصريحاته في موسم الرياض بعد انتهاء مسرحية زواج اصطناعي، حول عدم إهانة الفن .
كتبت كاملة أبو ذكري عبر حسابها الشخصي على موقع التواصل الاجتماعي: الأستاذ الفنان إلي كنت واحده من محبيه لو حضرتك فاكر إنك لما تعمل عمل إتحضر و إتكتب و إتنفذ في تلات أيام و تروح تعرضه و ترقص و تغني و تضحك و بعد كده تأخد ألاف الدولارات .
وتابعت: لو ده بتسميه فن فأنا لا يشرفني إني أكون زميله لك في هذه المهنه و لما تكون بتعرض التفاهات دي ده لا يشرف الفن المصري و لما تعرض التفاهه دي و جارك بيدبحوا أطفاله و نساءه و رجاله و تقولي الفن .
وأضافت كاملة أبو ذكري: يبقي ماعنديش كلام أقدر أقوله غير إن الإحساس و الفن نعمه إنتم أخر ناس تتكلموا عنها.
كان عبر الفنان بيومي فؤاد عن شدة حزنه من الهجوم الحاد والانتقادات التي تعرض لها أبطال مسرحية زواج اصطناعي، موضحًا إلى أنهم لا يقدمون ضحكًا بل يقدمون فنًا.
وقال بيومي فؤاد في نهاية عرض مسرحية زواج اصطناعي: أنا وكل زملائي دول إحنا بنحبكم وهنفضل طول عمرنا نحترمكم.. كتر خيركم.. إحنا بنتعب وبنقدم فن مش عشان نيجي نضحك.. لو الموضوع كدة يبقى فيه فنانين من أيام نجيب الريحاني لغاية محمد أنور المفروض ينتحروا.. تحياتي لحضراتكم أنا آسف.
تصريحات بيومي فؤاد
وتابع بيومي فؤاد: إحنا اتظلمنا والله واتهنا وإحنا جايين نقدم فن.. اقسم بالله احنا مش بتوع فلوس.. والله العظيم لو العرض ده اتعمل بدون أجر لمدة 15 يوم كمان هيبقى لينا شرف وفرحانين جدًا.. وسيادة المستشار يعلم ده.