فتاة الفستان/ أثارت فتاة بـ جامعة طنطا تدعى حبيبة طارق جدل بسبب ارتدائها فستان قصير وذهبت بيه إلى الكلية، وتعرضت إلى التنمر والتحرش اللفظي من نساء ورجال.
فتاة الفستان بـ جامعة طنطا تثير الجدل (تفاصيل)
وروت حبيبة تفاصيل ما حدث معها خلال مداخلة هاتفية ببرنامج الحكاية للاعلامي عمرو اديب المذاع عبر قناة ام بي سي مصر، قائلة: “من اول لما دخلت اللجنة لاقيت المراقب خد بطاقتي وسألني قالي انتي مسلمة ولا مسحية قولتله مسلمة، ولما خلصت الامتحان وكنت خارجة من اللجنة لاقيت مراقبة ست كبيرة بتوقفني وتنادي لصاحبتها ولاقيتها بتقولها في وسط صحابي وزمايلي والمراقبين نسيتي تلبسي البنطلون بتاعك ولا اية؟؟، والتانية تقولي انتي بقى جاية منين يا ماما ترد الست تقولها شكلها اسكندرانية وتقولها انا شوفت في البطاقة بتاعتها”.
وأضافت قائلة: “ولسه هسأل جابتها منين وهي اصلا مش مراقبة عليا لقيتها بتقولها ديه كانت محجبة بس قلعتها انا شوفت البطاقة بتاعتها وانا مش ملاحقة ارد عليهم خالص راحت قالتلي انتي كنتي محترمة زمان ودلوقتي بقيتي قليلة الادب؟ معلش هي فترة وهتعدي من عليكي”.
قصة فتاة الفستان
واردفت قائلة: “قبل ما اسيبها وامشي قالتلي ربنا يهديكي وترجعي لحجابك وديه فترة وهتعدي والناس في الكلية بصتلي كتير وانا ماشية الناس بقيت تنادي بعض ليه كل ده يحصل فيه انا معملتش في حد حاجة لية اتهاجم على فستان والفستان ولا عريان ولا في اي مشكلة ايه يعني الفستان تحت الركبة، وبسببهم لاقيت الناس كلها اتلمت واتفرجت عليا وقعدوا يندهوا لبعض وهي تنادي رجالة تتفرج وبعدين مكنتش فاهمة بينادوا لبعض يتفرجوا على ايه الحتة اللي باينة من رجلي زعلتكوا في اية”
وتابعت انها ليست المرة الأول التي تتعرض فيها إلى هذة المشكلة قائلة: “وديه مش اول مرة اتعرض لحاجة زي كده في الكلية مرة كنت لابسة بنطلون واسع لاقيت مراقب بيعاكسني وانا معدية وبيقولي ايه يا قطة!!”.
واختمت حديثها بالمطالبة باخذ اجراءات قانونية قائلة: ” مش من حقهم يقولولي كدة ولازم يكون في اجراء قانوني عشان ده كدة تحرش لفظي وتنمر وبعدين الفستان ولا عريان ولا شفاش والست تقولي افرضي الفستان طار حتى لو حصل ملهاش دعوة واكيد انا هبقى لابسة تحت الفستان حاجة يعني”.