أعرب السيناريست تامر حبيب عن شدة تأثره بعد أن شاهد الحلقة الأخيرة من مسلسل الهرشة السابعة، وذلك من خلال منشور عبر حسابه الشخصي على موقع التواصل الاجتماعي فيسبوك.
وكتب تامر حبيب، قائلًا: «امبارح كان عندي واحد صاحبي ماكنش شاف الهرشة السابعة، وأنا مش على بعضي، ومتوتر بجد علشان آخر حلقة كانت نزلت وأنا مش قادر اصبر، وعايز اتفرج وهو من كتر ما سمع كلام حلو، كان مستني علشان يشوف المسلسل كله على بعضه».
وأضاف: فأقترحت عليه من باب أني أقعد مع الولاد أطول وقت ممكن وأشبع منهم قبل ما يسيبوني، اقترحت عليه أني افرجه على أول حلقة، وقعدنا نتفرج على الحلقة الأولى أنا وهو واثنين من الأصدقاء الواقعين في غرام المسلسل زيي.. يا نهار أبيض على الاحساس، الولاد كانوا لسة صغيرين.
وواصل: و خدونا معاهم رحلة مليانة خبرة وتقل وشجن وضحك ودموع و حب و وجع و بهجة و الم، حياة في حمستاشر حلقة، سبع سنين بعبلهم زي ما بيتقال، و مش آدم و نادين و شريف و سلمي بس، لا ده هما و اللي خلفوهم، اللي هما كمان حلوين قوي و بني آدمين قوي…. و بشكل شخصي، و اللي كان يعرف امي كويس اكيد هايتفق معايا…. البديعة فيفي ام آدم مابتفكركوش بالعظيمة زيزي ام تامر ؟.
واختتم تامر حبيب: و بعد ما شفنا اول حلقة، و صاحبي مشي، و قعدنا شفنا آخر حلقة، و قعدت اعيط من نص آخر مشهد لغاية ما التيترات خلصت، كأني في صالة المسافرين في المطار بأودع ولادي اللي مسافرين لمجهول و انا بأدعيلهم بالسعادة و الرضا … و بافكر في رحلة السبع سنين و في دماغي صوت عبد الحليم بيغني : شوف خدتنا منين يا قلبي و شوف سابتنا فين…. باحبكم و كل ما هاتوحشوني هاتفرج عليكم تاني و تالت و عاشر يا حلوين يا ولاد الحلوين.