دافع باسم يوسف، الفنان المصري الساخر، عن اللاعب المصري الدولي محمد صلاح، بعد الانتقادات التي تعرض لها منذ نشره فيديو تضامنه مع فلسطين.
وقال باسم يوسف، في منشور له على موقع التواصل الاجتماعي “فيسبوك”: “المفروض في عالم طبيعي أن يكون لاعب الكرة أو حتى الكوميديان في الصفوف الأولى للدفاع عن القضايا الإنسانية. ده دور الإعلام. والسبب أن اللي بيحصل غير كده أن الإعلام بيفشل في ده بل و بيزيد الأمور سوءًا، فتتجه الناس للأشخاص الناجحين في مجالهم عشان يغطوا على فشل في مجال مش بتاعهم، و ده أول السكة في أننا بنظلمهم معانا”.
وأضاف باسم يوسف: “صلاح لاعب كرة. لا يتدخل في السياسة من أول يوم. ولا، احتفاله بالكريسماس مش رسالة سياسية. الاحتفال بأي مناسبة ده نشاط إنساني بحت، ولا يجب مقارنة صورة جنب شجرة كريسماس أو حلويات المولد بوضع علم أو رمز للتضامن”.
وتابع: “تعزيته في موت ملكة إنجلترا هو أيضًا فعل إنساني وليس سياسي. صلاح أو أي لاعب كرة لو كان بيلعب في دوريات الخليج و لاقدر الله لو أمير أو ملك أو شيخ أو حاكم الدولة أو الامارة أو المحافظة اللي فريقه بيلعب له توفاه الله كان حيكتب تعزية برضة، لأن ملكة إنجلترا عند الإنجليز اللي بيلعب عندهم مكانتها في قلوب ناس كتير جدا زي مكانة هذا الملك أو الامير في قلب شعبه. فده بروتوكول و ليس فعل سياسي”.
ودافع باسم يوسف عن محمد صلاح قائلا: “مقارنة فيديو صلاح باللقاء بتاعي هو ظلم بين. لأن الكلام مش شغلة صلاح. و لأن طلاقة اللغة مش شغلة صلاح. لا صلاح حيعرف يتكلم و يحاور زيي و لا أنا اقدر العب كورة زي صلاح. يا جدعان ده انا اكبر انجازاتي الكروية اني عملت تلات عمليات غضروف و انا عندي ركبتين اتنين بس!!!! ده انا خدت كباري بعدد شعر راسي. و لو على اللغة، صلاح، اللي ما دخلش مدارس لغات زيي بيتكلم ايطالي. انا معرفش كلمتين ايطالي على بعض”.
وأضاف باسم يوسف: “صلاح بالانجليزي المكسر و الاداء “الفلات” او المخطوف زي ما ناس وصفته، الاداء “الوحش” ده عمل ملايين التفاعلات و المشاهدات. كونه بقى ان :الكلام مايع، مافيش ادانة واضحة، مسك العصاية من النص. قصف الجبهات مش دور صلاح خالص. و اصلا هو فيديو غير موجه لينا. و رب فيديو بسيط من غير عياط و من غير نرفزة و من غير شتيمة و من غير ادانات و شجب و عياط و دموع لكن يوصل برة و يغير صوت واحد ده ابرك بكتير”.
وختم باسم يوسف منشوره قائلا: “واحد زي صلاح، ملهم لأجيال كتيرة قصة كفاح غير مسبوقة، راجل بيتبرع في السر اكتر من العلن، فاتح بيوت انا و انتم مش عارفين عددها. واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الانظمة و اكبر الدول فشلوا فيها؟ أتأخر؟ ياسيدي المهم انه وصل. مش قوي بما فيه الكفاية؟ اه بالنسبة لك، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية. الدنيا برة غير خالص الوطن العربي عندنا بس ده له بوست لوحده. فاكرين لما صلاح نزل صورته في القدس و كتب تضامن؟ اتشتم برضة. طيب لما يبقى عندنا واحد بوزن صلاح و كل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه. صلاح مش المفروض يكون هو هدف لغضبك”.