تُعد عصبية الزوج من أكثر الأشياء التي قد تؤدي لخلق الخناق والمشاكل بين الزوجين، لذا قدمت الإعلاميتان منى عبدالغني وهبة الأباصيري، نصائح للسيدات، لتجنب المشكلات مع أزواجهم وقت غضبهم، وذلك في حلقة أمس من برنامج «الستات مايعرفوش يكدبوا» المذاع على قناة الـ CBC.
وقالت الإعلامية منى عبدالغني: «أول حاجة لازم تديله الوقت علشان يهدأ، ومتتناقشيش معاه أبدًا وهو متعصب، أجلي الحوار والمناقشة والعتاب لحد ما يهدأ».
تجنبوا ردود الأفعال اللحظية
ومن جانبه وافقتها الإعلامية هبة الأباصيري الرأي في الهدوء وقت عصبية الزوج قائلة: «لما يكون متعصب، محبكش أنا كمان أخد رد فعل، وفي الآخر تقلب خناقة في البيت، أي حد في الدنيا لو عنده شوية عقل هيفكر في الكلام ده، وفي ناس كمان لما يحسوا إنهم هيتعصبوا في البيت يخرجوا من البيت، يلف بالعربية ربع ساعة أو يشرب علبة عصير».
وأضافت هبة الأباصيري في رأيها على حد الكلام مع الزوج أثناء عصبيته للحد من خلق الخناق والمشاكل: «لو الظروف حكمت وزوجك أو ابنك اتعصب أو شخص مش غريب لازم تحتوي الموضوع وتلتزمي الصمت بشكل كبير، وبلاش نصدر وش البرود المتناهي عشان ميتعصبش أكتر».
غيري المكان لو مخرجش منه وهو متعصب
ومن جانبه علقت الإعلامية منى عبدالغني: «لو مخرجش من المكان اللي أنتي قاعدة فيه وهو متعصب غيّري انتِ المكان واسكتي، وهو هيفهم إنك مش عاوزة تضغطي عليه وإنك حاسة بيه، ممكن يبقى عنده مشاكل، اتكلمي معه بهدوء وحاولِ تتجنبي إنك تعصبيه أكتر، أديله وش إنك مصدومة من اللي بيعمله وحزينة إنه بيزعق كده، حاولي تكسبي تعاطفه».
وواصلت: «الراجل ممكن يبقى جاي من الشغل ومش عاوز يتكلم في مشاكل الشغل وعنده أقساط كتير وحاجات في دماغه، ممكن ميبقاش زعلان منِك لمجرد إنه متكلمش معاكِ».