حلت الفنانة شيرين، ضيفة برنامج “مساء dmc”، الذي يقدمه الإعلامي رامي رضوان، والذي يتم عرضه عبر شاشة قناة “dmc”، وتحدثت خلال الحلقة عن تفاصيل أعمالها الفنية القادمة،وأسرار عن حياتها الشخصية.
قالت شيرين: “أنا بمتحن نفسي على المسرح، وبحبه جدا.. اللقاء المباشر مع الجمهور بيحسسني إني عايشة وبدأت أعمل مسرح من وأنا عندي 10 سنين في الباليه”.
وأضافت: “أنا رقصت باليه في دار الأوبرا المصرية، ولما اتحرقت قعدت مولعة 3 أيام ومكنش حد عارف يطفيها، مع المطافي كانت قدامها، والأوبرا دي بيتي اللي بروح أعرض وأتمرن عليه، فلما اتحرقت حسيت إني ضعت، بيتي اتحرق.. كان في بديل هو البالون بس برضو اتحرق”.
وأعلنت شيرين أنها تشارك في مسلسل “سوق الكانتو”، التي من المقرر أن يتم عرضه في السباق الرمضاني القادم، حيث قالت: “طالعة ضيفة شرف في مسلسل “سوق الكانتو”، مش حد أساسي، هتشوفوني شوية صغيرين بس أقول للناس كل سنة وأنتم طيبين، وعجبني في الشخصية أنها مش ست مصرية، وأن المسلسل سنة 26، وأنا كنت أتمنى أعيش في الوقت ده بس أكون مصرية”.
وتابعت: “مع شديد الأسف أنا بنتقي الأدوار عشان كده بقعد أهوي كتير في البيت، بس مبيهمنيش مش بتضايق، لأني خوافة جدا أعمل حاجة متعجبش الجمهور هيبقى دمي تقيل أوي”.
واختتمت شيرين حديثها، قائلة: “الجمهور اللي حبني وحب أعمالي لازم احترمه، وأكون قد حبه ليا، ولازم أخلي بالي من طريقتي وشكلي، هقولهم إيه؟ وهما نفسهم يسمعوا إيه؟ دي حاجات كلها لازم أبقى خايفة وأنا بقابلهم”.