كتبت: مي الجوهري
نشر الفنان حسني شتا على مواقع التواصل الاجتماعي “فيسبوك” صوره لتعليق كتبه أحدى الجمهور وهو يستاء من تعليقات بعض الجمهور، معلقاً على الصوره قائلاً “الأستاذ ده كاتب لي كومنت بيقول لي الله يلعنك ويلعن أمثالك، اللي هو بيلعني ليه طيب! علشان أنا ممثل؟ ولاعلشان إيه عاوز أفهم، وبعدين بدل ما يلعني طب ما ينصنحي باللي عاوز يقولهولي، الأستاذ عايش في فرنسا وأكيد ماشي يلعن كل الناس هناك”.
تابع قائلاً””بجد أنا بحاول ما انتبهش لأي كلام سلبي أو كلام فيه كمية أمراض نفسية بتدل على قدر تخلف أصحابها النفسي والعقلي وكل اللي بعمله إن ببتسم وبقول ربنا يشفيه، بس أول مرة أحس إني متضايق بسبب تعليقات شبه كده، زي مثلا واحده كانت كاتبة لي بحبك أوي وبموت فيك ودمك خفيف وقمر وأي حاجة بتمثل فيها بتفرج عليها علشانك بس يا خسارة مصيرك جهنم، دخلتني النار”.
أضاف شتا “وتعليقات كتير طول الوقت بحبك بس ربنا يهديك وتبطل تمثيل، بحبك وبحب دورك في كذا بس ربنا يهديك، أنا فعلا مش مستوعب هو إنتوا بتدخلوني النار ليه؟ ومنين بتتفرجوا وتسلوا وقتكم وتضحكوا وتنبسطوا من قلوبكم وتبقى في قمة السعادة إنك تتصور مع ممثل وفي الآخر أنت شايفه في النار؟ مش لاقي تفسير، هو إنتوا فعلا شايفنا في النار وإن إحنا شياطين؟ بس أنا بحب مهنتي جدا وبحب كل الناس اللي بتحبني وبدعي للناس اللي بتفكر بشكل غريب ربنا ينور عقولهم”.
الجدير بالذكر ان الفنان حسني شتا شارك فى السباق الرمضان الماضي فى مسلسل “”ليالينا 80” مع إياد نصار، وغادة عادل، وخالد الصاوي، وصابرين، وميدو عادل، ومحمد علي رزق، وعماد رشاد، ومن تأليف أحمد عبد الفتاح، وإخراج أحمد صالح.