كشف الفنان عباس أبو الحسن، مؤلف فيلم “إبراهيم الأبيض”، عن سبب حذف الكثير من المشاهد من العمل وذالك بعد عرضة في السينما منذ 11 عاما.
ونشر أبو الحسن، بوستر الفيلم عبر حسابه الشخصي على موقع أنستجرام، وعلق عليه مستعيدًا كواليس إعداده، حيث كتب: “كتير كانوا عايزين يقروا السيناريو الأصلي لفيلم إبراهيم الأبيض، السيناريو كتبته أول مرة سنة ١٩٩٩، وعرضته على مروان حامد، بعد ما شفت فيلمه القصير، لي لي، وانبهرت به وكان يقيني إنه أقدر حد يعرف يجيب روح ومزاج الفيلم النفسي”.
وتابع: ” قابلت مروان وبدأت رحلة ١٠ سنين بنحاول نعمل الفيلم، قابلنا فيها تقريبًا كل منتجين مصر وكنا مستقرين على نفس الكاست والكرو وقدرنا بعد مشوار طويل جدا مضني ومحبط إننا نعمله بالظبط زي ما احنا عايزينه، الفرق بين أول نسخة، ونسخة التصوير وفرق الـ ١٠ سنين، بسيط جدا يكاد يكون معدوم والنص صمد زي ما هو”.
أردف: “هتلاقو فرق بين السيناريو والفيلم بمعنى إن مشاهد كتيره موجودة في السيناريو مش موجودة في الفيلم وده لسببين أساسيين: السبب الأول إن نسخة المخرج النهائية كانت أطول بكتير من اللي الموزع عايزه، وكان هيضطر يضحي بحفلة في اليوم عشان طول الفيلم، السبب التاني إن مش كل حاجة اتصورت مروان كان راضي عنها، وحذف مشاهد عديدة بإرادته لأسباب فنية مختلفة لا مجال للخوض فيها، يظل الفيلم النهائي ممتع ومرضي جدا لي كمؤلف وكمشاهد”.