قام السيناريست تامر حبيب بانتقاد عملية من عمليات التجميل التي تقوم بعض الفنانات بإجرائها، وذلك من خلال منشور عبر حسابه الشخصي على موقع التواصل الاجتماعي فيسبوك.
كتب تامر حبيب: عندي سؤال يا ريت حد يجاوبني عليه، هل فيه عملية تجميل معينة بتخلي الممثلة او الست اللي تعملها عموماً تبقى كأنها مكورة الأكل في جنب بقها و بتتكلم من غير ما تبلعه ؟.
وأضاف: طيب هما مش زمان اهلنا كانوا بيزعقولنا و يقولولنا: ماتكورش الاكل علي الجنب كده، و ابلع اللي في بقك الاول علشان كده عيب ؟.
وكان أشاد تامر حبيب، بمسلسل الهرشة السابعة، وذلك بعد انتهاء حلقاته وبدء عرض مسلسلات جديدة من اليوم.
كتب تامر حبيب، من خلال حسابه الرسمي على “إنستجرام”: إمبارح كان عندي واحد صاحبي ماكنش شاف الهرشة السابعة، وأنا مش علي بعضي، ومتوتر بجد علشان آخر حلقة كانت نزلت وأنا مش قادر أصبر، وعايز أتفرج وهو من كتر ما سمع كلام حلو، كان مستني علشان يشوف المسلسل كله علي بعضه، فاقترحت عليه من باب اني اقعد مع الولاد اطول وقت ممكن و اشبع منهم قبل ما يسيبوني، اقترحت عليه اني افرجه علي اول حلقة، و قعدنا نتفرج علي الحلقة الاولي انا و هو و اثنين من الأصدقاء الواقعين في غرام المسلسل زيي”.
وتابع: “يا نهار ابيض علي الإحساس … الولاد كانوا لسة صغيرين، و خدونا معاهم رحلة مليانة خبرة و تقل و شجن و ضحك و دموع و حب و وجع و بهجة و الم…. حياة في خمستاشر حلقة… سبع سنين بعبلهم زي ما بيتقال…. و مش آدم و نادين و شريف و سلمي بس، لا ده هما و اللي خلفوهم، اللي هما كمان حلوين قوي و بني آدمين قوي…. و بشكل شخصي، و اللي كان يعرف امي كويس اكيد هايتفق معايا…. البديعة فيفي ام آدم مابتفكركوش بالعظيمة زيزي ام تامر ؟”.
كما أضاف: “و بعد ما شفنا اول حلقة، و صاحبي مشي، و قعدنا شفنا آخر حلقة، و قعدت اعيط من نص آخر مشهد لغاية ما التيترات خلصت، كأني في صالة المسافرين في المطار بأودع ولادي اللي مسافرين لمجهول و انا بأدعيلهم بالسعادة و الرضا … و بافكر في رحلة السبع سنين و في دماغي صوت عبد الحليم بيغني : شوف خدتنا منين يا قلبي و شوف سابتنا فين…. باحبكم و كل ما هاتوحشوني هاتفرج عليكم تاني و تالت و عاشر يا حلوين يا ولاد الحلوين”.