تحدث الإعلامي “إبراهيم فايق” مُقدم برنامج “جمهور التالتة” المُذاع عبر قناة أون تايم سبورت 2، عن ما حدث في أزمة البطل “بيج رامي“.
وقال: “كتير ميعرفوش حجم المشقة والتعب اللي مر بيهم البطل “رامي السبيعي”، وأد إيه هو عانى في وسط ما كان عنده كورونا والمفروض ان واحد غيره مكانش يلعب لأء دا لعب وكمان أخد البطولة وتحدى كل الصعوبات”.
وأضاف: “تسريب الأرقام الخاصة اللي بيطلبها كل ضيف للظهور الإعلامي ده أمر سيء جدًا وغير صحيح بالمرة”.
وأوضح: “العيب في الموضوع هو الاستهانة بخصوصية “رامي” في الموضوع ده”.
وأكمل: “نجوم الكرة والبعض منهم بيطلبوا فلوس عشان يظهروا في البرامج الإعلامية، وده حقهم وجزء من الدخل بتاعهم، والفنانين كمان كدا وعمرنا ما سمعنا حاجة عن الأرقام اللي بيطلبوها”.
وتابع: “اللي سرب الرقم اللي طلبه “رامي” يقدر يطلع ويقول إن لاعب الأهلي أو الزمالك طلب مني كذا عشان يطلع معايا.. لأ طبعًا لإنك هتبقى في وش المدفع والجمهور مش هيرحمك”.
وأشار: “أي حاجة بعيد عن الأهلي والزمالك نقدر نخبط فيها براحتنا عادي.. بس لا تبقوا غلطانين لأن “رامي” برضو وراه اللي هيدافع عنه”.
وواصل: “رامي لما جاب المركز الخامس في 2015 محدش قاله تعالى قولنا حصل معاك ايه عشان تاخد المركز ده، في 2019 لما إتصاب في كتفه ومدخلش البطولة ولا حد عبره وقاله انت فين و2020 لما خسر الراعي الرسمي له مفيش ولا راجل أعمال ولا مؤسسة من المؤسسات الراعية المعروفة طبطب عليه وقالوله تعالى إحنا هنكمل معاك”.
وأستكمل: “لما بقى بطل دلوقتي الكل عاوز يستضيفه عنده، طب هو من حقه إنه يطلب الرقم اللي هو عاوزه وأنت من حقك ترفض أو تقبل ولكن في سرية”.
وكشف: “الشماعة بقى اللي بتتقاله إنك بطل رياضي والمفروض تطلع قدوة للشباب وتنصحهم إزار هتاخد فلوس على كده؛ عادي طب مأنت نفسك بتطلع تقول انك قدوة وبتقبض من القناة فلوس.. بلاش الكلام ده إحنا كلنا بنشتغل عشان الفلوس، وهو معملش حاجة الراجل طلب حقه”.
وتحدث: “مش كل حاجة حلوة لازم نشوهها والتريند اللي يكمل هو الوحش بس، ولو دكر اطلع قول لاعيبة الأهلي والزمالك بيطلبوا مني كذا عشان يطلعوا معايا في البرنامج”.
واختتم حديثه قائلًا: “أتمنى الاتزان بقى شوية والعقل، والحاجة الإيجابية اللي حصلت من ورا الموضوع ده إن في ناس كتير لما عرفوا اللي حصل كلموا “رامي” وقالوا يا إبني أنت المبلغ اللي طلبته دا أقل بكتير من اللي انت تستحقه انت كان المفروض تطلب ضعفه”.