تُعد الفنانة أيتن عامر، من الفنانين القلائل الذين أثبتوا وجودهم في الوسط الفني، منذ ظهورهم على الساحة الفنية، وتتوالى انجازتهم حتى وقتنا الحالي، حيث شاركت في ماراثون رمضان الحالي 2022 بعملين استطاعت أن تحقق نجاحًا كبيرًا بهما هما “مكتوب عليا-الاختيار 3”.
وأجرى موقع “أوان مصر”، حوار مع النجمة الموهبة متغيرة الجلد بين الكوميديا والإثارة والتشويق أيتن عامر، لتكشف كواليس مشاركتها في مسلسل مكتوب عليا، ومسلسل الاختيار 3.
وجاء نص الحوار كالتالي:-
أيتن عامر تتحدث عن مسلسل مكتوب عليا
-في البداية.. أي اللي جذبك للموافقة على المشاركة في مسلسل مكتوب عليا؟.. ومين رشحك للدور؟
اتحمست جدا للمشاركة في مسلسل مكتوب عليا لأنه بطولة أكرم حسني وأنا من فانز أكرم وبحبه جدا وهو انسان جميل، وموهوب بجد، والكواليس كانت كلها لذيذة وضحك وهزار، واللي رشحني للدور المنتج والمخرج خالد الحلفاوي وأكرم حسني كلمني.
هل شخصية روقة تختلف كثيرًا عن شخصيتك في مسلسل شقة فيصل وفرصة تانية؟
الحقيقة البنت اللي بتحب بطرف واحد قدمتها قبل كده في فرصة تانية وقدمتها في شقة فيصل بس كل مره بتبقى مختلفة عن التانية، واعتقد ان كل مره الحمد لله بتتقدم بشكل مختلف، وريهام كانت قضية مختلفه غير روقة ريهام كانت ضعيفة مقدرتش تعدي المرحلة اللي كانت فيها، لكن روقة لا عدت وكررت تنتقم، وبردوا شخصية شقة فيصل عدت الموضوع ومركزتش في الانتقام، فهتلاقي كل شخصية ليها الخط بتاعها.
-تعليقك على ردود الأفعال الإيجابية بعد عرض أولى حلقات العمل؟
ردود الأفعال فاقت كل التوقعات، وأنا فرحانه جدا، بالشخصية وأن الناس اتفاعلت معاها، وفي ناس بتقولي احنا مش طايقينها إحنا عايزين نضربها دي لازقة دي رزلة، دي حقيقة لأن الشخصية كده فعلا، هي ثقافتها كده وفي ناس كتير شايفه اننا أول مره اقدم كوميدي ودي حاجه جديده عليا، هما مكنوش شايفيني اننا أول مره اقدم كوميديا مركزه، وده باين للناس بشكل مختلف.
-هل في تتشابه بين شخصية روقة وأيتن عامر في الحقيقة؟
مش شايفه في اي تشابه بين روقة وايتن يعني روقة دي لو قابلتها في الحقيقة هقتلها، شخصية مستفزه بالنسبالي.
-هل المخرج خالد الحلفاوي أعطى ليكي حافز خلال كواليس مكتوب عليا؟
كنت مبسوطه جدا بالتعاون مع خالد وكل مره مش بيخيب ظني ودايما بيديني مسؤولية كبيرة، ودايما بحاول على قد ما اقدر أعمل مجهود مضاعف عشان ابقى قد المسؤولية، والحمد لله إن العمل طلع بشكل كويس وعاجب كل الناس.
-أغنية ستو أنا حققت نجاح كبير.. هل كنتي متوقعة النجاح ليها؟
الأغنية الحمد لله كسرت الدنيا ومكنتش متوقعة النجاح ده كله بس أكرم عمره ما بيعمل حاجه ومش بتنجح، وأنا عندي ثقة متناهية فيه وأنا عارفة إني أكرم بيحبني جدا وأنا بحبه جدا وبنحب نشتغل مع بعض وكيميا بينا راكبة بشكل كبير، فلما بيبتعلي حاجه ببقى واثقة أنها هتكسر الدنيا.
-هل سيوجد جزء ثاني لمسلسل مكتوب عليا؟
موضوع جزء تاني لمسلسل مكتوب عليا لم يحسم بعد، وان أنا اشارك فيه أو لأ، لكن احتمال كبير يبقى فيه، جزء تاني.
أيتن عامر تتحدث عن مشاركتها في الاختيار 3
-شاركتي في مسلسل الاختيار 3.. مين رشحك للعمل؟.. وكواليس شخصيتك في العمل؟.. وهل العمل أضاف لمسيرتك الفنية؟
اللي رشحني للاختيار كان دكتور بيتر ميمي ودوري فيه كان زوجة ظابط شغال في إحدى الوزارات وكنت بتكلم عن فترة العصيان المدني وأن قد اي ولاد الظباط مش بيشوفهم وإن هو جي معانا ده كانت فاكراه جي يوصلها ويمشي فبردوا أنا ببين زوجة الظابط اللي بيجسد منصب مرموق في الدولة وإن قد اي الناس دي فعلا بتبقى مدية 90٪ لشغلهم.
أنا شاركت في مسلسل الاختيار، وانبسطت جدا إن أنا شاركت فيه حتى لو كنت ضيفت شرف، في كام مشهد يعني لكن ده عمل مشرف يعني بيخدم تطوير عقل المواطن وتطوير وعيه لأن ده بيورينا وبيوثق أحداث مهمه في تاريخ مصر، وشرف لأي فنان إن هو يشترك في مسلسل الاختيار، وأنا كنت محظوظه بده ولو في أي نوعية لأعمال الاختيار هيكون عندي استعداد طبعا للمشاركة فيها لأن دي حاجه جميله جدا ووثيقة لتاريخ مصر الحديث.
-كلمينا عن شعورك وأنت بتمثلي مع الفنان الكبير كريم عبد العزيز؟
التعاون مع كريم عبد العزيز من أفضل الحاجات اللي حصلت.. أنا من زمان اترشحت لكذا حاجه كانت بطولة كريم ومكنش الموضوع بيكتمل وكنت يعتذر لسبب، ولكن أنا مبسوطه اننا اتجمعنا في كادر واحد، دي من أفضل الحاجات اللي حصلت بالنسبالي لأن أنا من عشاق كريم عبد العزيز، وبحب جدا تمثيله، ومبسوطه إن أنا اشتغلت معاه.
أيتن عامر تتحدث عن مسلسل النقطة العايمة
-مسلسل النقطة العايمة حقق نجاح كبير في الدول العربية.. كلمينا عن كواليس العمل؟
مسلسل النقطة العايمة كان مسلسل ليه طبيعة خاصة كان بيتكلم عن ذكريات الماضي لأن الشخصية أبوها وأمها ماتوا في حادثة، والحقيقة الدور دي ارهقني نفسيا واستعانت بدكاتره كتير عشان أفهم اي النقطة العامية واي الأعراض اللي بتم من خلال تناول حبوب الهلوسة لأنها اتلعب بيها لعب كتير جدا لانها ضحية، فالشخصية بتعاني من مطاردت عقدت الذنب بقيت المسلسل، والموضوع ده كان مآثر عليا جدا جدا، والكواليس كلها كانت مشدودة بحد كبير والمسلسل طبيعته مختلفة، بس كان فيه مشاهد كويسه مكنش بيكون فيها نكد وكانت لطيفة، والكواليس مع عمي صلاح ومحمد عز كانت جميلة جدا، عمي صلاح مربيني ومحمد عز صديق من زمان بقاله 10 او 12 سنه فداليا وروقه شخصيتان مختلفين.
-هل تعتقدي أن مسلسل النقطة العايمة لما عرض على منصات أضعف نجاحه في مصر؟
النقطة العايمة لما هيتذاع على التلفزيون هيتشاف بشكل كويس، وهيحقق نجاح كبير أوي، لأن المسلسل عجب الناس أوي، بغض النظر أنه اتعرض في مناطق قليلة في منصات، لكن ردود الفعل من الوطن العربي كان خطير وعظيم، في مصر مش بيتشاف أوي بس برا واخد حقه وراضيه تماما بنجاحه.
أيتن عامر تتحدث عن تجاربها الغنائية
-خوضتي تجربة في الوسط الغنائي.. أي تعليقك على ردود الأفعال الايجابية وأشادة الكثير بصوتك؟
تجربة الغنا لطيفة وبحضر حاجات هتنزل بعد الصيف أغاني لطيفة كلها، ودمها خفيف وان شاء هتبقى جاهزة قريبا للعرض.. ردود فعل الجمهور كانت عظيمه والناس حبوا صوتي جدا.
-من هو الفنان التي كانت تتمنى أيتن عامر العمل معه، من الزمن القديم؟
كان نفسي أشتغل مع رشدي اباظه وعمر الشريف ويمكن رشدي أباظة أكتر، وحاسه اداءه التمثيل كان ينفعني معاه أكتر يعني كان يعمل أفلام صعبة وكان دايما العنصر النسائي معاه في الافلام بتاعته، ودايما بيبقى ليه تواجد بقوه وحضور ظاهر.
أيتن عامر تتحدث عن تجسيدها السيرة الذاتية لفنان
-هل لو عُرض عليكي تجسدي سيرة ذاتية لفنان هتوافقي؟
أنا مش بحب أوي اعمل سيرة ذاتية فاعتقد اننا هعمل اي مسلسل بيتكلم عن سيرة ذاتية لفنانة لكن اقدر اعمل ده لو الناس مشافتهوش يعني أعمل انها مشهد اشتراك في مشهد سياسي حد ليه انجاز علمي بس مش تمثيل ولا غنى ولا رقص.
أي رأي أيتن عامر في السباق الرمضاني الحالي 2022.. وأي الأعمال تشاهديها؟
سباق رمضان هذا العام ثرية وتحمل قدر عالي من الجودة، بس بتفرج على راجعين يا هوى والاختيار، والمشوار والكبير اوي.
هل سنرى أيتن عامر بأعمال جديدة بعد انتهاء الماراثون الرمضاني؟
والله أنا عندي فيلم عمهم هينزل في العيد أنا فيه ضيفة شرف وعندي بعض الأعمال بحضرها أعمال منصات.