عبر الفنان أمير كرارة عن شدة سعادته بتقديم مسلسل سوق الكانتو خلال السباق الرمضاني 2023، مشيرًا أن العمل لم يأخذ حقه في الماراثون الرمضاني، كما تحدث عن كواليس إصابته في مسلسل هروب اضطراري مع الفنان أحمد السقا.
وقال أمير كرارة خلال حواره في برنامج الراديو بيضحك 9090: كل حاجة في مسلسل سوق الكانتو كانت بحدود حتى الهزار، يعني كنت مضايق أوي وحاسس إني قديم أوي، كنت متضايق من نفسي بالشنب الرفيع، والمخرج حسين المنباوي كان نفسه يبين مصر الحلوة، الستات اللي ماشية من غير معاكسة ولابسة فستان فوق الركبة عادي من غير مشاكل، وممكن المسلسل ميكونش اللي رمضان عايزه.
وتابع: سوق الكانتو خد حقه بعد رمضان، وفي نوعية من الناس اتفرجت وكانوا منبهرين بيه، ولكن رمضان ليه ظروفه والناس بتحب القاعدة واللمة وتوقع الأحداث والأحداث السخنة زي مسلسل جعفر العمدة.
وأردف أمير كرارة: سوق الكانتو كان حالة مختلفة وعايز اللي يقعد له ويفهمه، وحد قالي اعتبر المسلسل ده حاجة سينيه في تاريخك، مينفعش برضه نعمل كل حاجة شبه بعض، وفي كذا مسلسل السنة دي كسر الدنيا.
كما تطرق أمير كرارة في حديثه عن تعاونه مع الفنان أحمد السقا، حيث قال: السقا ده جميل وأخويا وراجل محترف في الأكشن ولعبته من قبلنا وهو ملك الأكشن طبعًا ربنا يديله الصحة، عملنا مع بعض هروب اضطراري ونسل الأغراب.
وعن إصابته في كواليس فيلم هروب اضطراري، قال أمير كرارة: عملت مشهد مع أحمد السقا في هروب اضطراري كنا بنضرب بعض في أوضة زجاج، والمفروض أنا بضربه ولقيت تليفون قديم بضربه بيه في وشه ولكن مش بلمسه بعديه من قدام وشه، وحظي أنا أن التليفون عدى والسلك لف ودخل في عينه.
وأضاف: أحمد عنده ضمير أوي ومرضيش يوقف التصوير وراح ضاربني وسمعت طرقعة فكي وبقي مش عايز يرجع مكانه، ولقيته جاي يقولي أنت اتخبطت في مكتب ولا إيه؟، أحمد جميل وبيحب الناس كلها.