كشف الفنان أحمد مالك، عن تفاصيل بدايته في مجال الفن والتمثيل وطفولته، مؤكدأً أنه تعرض للتنمر بسبب بنيته الجسمية، في فترة مراهقته، وذلك خلال حواره مع الإعلامي الإماراتي أنس بوخش، في برنامجه AB Talks.
وقال: «أنا بدأت الشغلانة دي وأنا صغير أوي، أول مرة وقفت قدام الكاميرا كان عندي 8 سنين، وكنت بعمل إعلان مكرونة والمكرونة كانت نية علشان شكلها يبقى حلو، وكنت باكُلها وكنت عايز أرجع ولكن مينفعش علشان الناس بتزعق، المفروض التجربة دي لطفل مش حلوة، ولكن أنا كنت مبسوط زي يوسف عثمان في فيلم بحب السيما».
أحمد مالك: كنت بشعر بالأمان التام في اللوكيشن وأنا عندي 13 سنة
متابعاً: «كنت بدخل اللوكيشن وأنا طفل عندي 9 سنين كنت بحس أنه شيء بيكسر كل الواقع اللي كنت عايش فيه، وكنت بشعر بالأمان التام في اللوكيشن وأنا عندي 13 سنة، أنا عندي الجوع بتاع أني معملتش حاجة، مع أني عملت كتير، أنا مش عارف أنا عملت إيه مع أني الحمد لله اشتغلت كتير وعملت حاجات كويسة وممتن للمهنة جدًا».
أحمد مالك: لو هختار حاجة غير التمثيل هتبقى الكتابة
مستكملاً: «رؤيتي لنفسي وذاتي مرتبطة أوي بـ رؤيتي لمهنتي، وأنا معتقدش إني هعرف أعمل حاجة زي ما بعمل فن، والتمثيل اختارني من وأنا صغير جدًا وخلاص القدر اختار ده فأنا جزء من ده، وقررت إني هوهب حياتي والمعنى بتاعي هو الفن، ولو هختار حاجة غير التمثيل هتبقى الكتابة».
أما عن طفولته، فـ علق مالك في برنامجه AB Talks: «كنت طفل فضولي جدًا، وأنا صغير مكنش عندي ثقة في نفسي وده بينعكس دلوقتي، وكنت دايمًا بحس إني مش قوي بدنيًا وبحس بخذلان من هيئتي وشكلي، وتعرضت للتنمر في مراهقتي المبكرة وكنت بتكسف جدًا وطول الوقت عايز استخبى».