هاجم الفنان أحمد فلوكس، نقيب الموسيقيين هاني شاكر، لعدم اهتمامه باليوتيوبر مصطفى حفناوي الذي رحل عن عالمنا أمس الاثنين بعد صراع مع المرض.
قال فلوكس، في مقطع فيديو نشره على “فيسبوك”: “أبويا علمني إن مغلطش في حد كبير لكن أنا معرفش مصطفى حفناوي وأنا في بلد تانية ومتابعه من 8 أيام ومحدش زاره غير تامر حسني، لأن تامر راجل وبقاله 7 أيام بيناشد حد إنه يتعالج”.
وتابع: “دلوقتي كله بيقول الله يرحمه.. كله بمن فيهم الأستاذ الفاضل الكبير هاني شاكر اللي قال أنا معرفوش بس قلبي وجعني.. طب قلبك موجعكش وهو مش لاقي مستشفى تستقبله وهو عنده جلطة في مخه، اتقوا الله كفاية متاجرة بالبني آدمين، كفاية، إيه ده إيه ده، ما كان بقاله 6 أيام مش لاقي حد يعالجه أو يساعده”.
وأضاف: “اللي عرف الناس القصة لما تامر حسني راح زاره، دلوقتي بقى كله فاكره، أستاذ هاني شاكر هو تامر حسني النقيب ولا أنت، اتقوا الله، إنتو بتاجروا بموت بني آدم، ده شاب وصغير، الناس اللي كاتبين الله يرحمه الفنانين والفنانات والمنتجين كنتوا فين وهو يوتيوبر وكان عايز يمثل، وهو بيروح من الكرفان ده للكرفان ده وعايز يمثل، مخلتهوش يمثل ولا يبقى فنان ليه، ولا لما مات افتكرتوه، إيه ده، طيب مش أنتو زعلانين عليه، أنا بطالب كل اللي كتب الله يرحمه إنه يروح يبني جامع باسمه مدام انتو رجالة أوي كدا، احنا في زمن غريب”.
وتعرض فلوكس بسبب هذا الفيديو لهجوم عدد كبير من نشطاء مواقع التواصل الاجتماعي، حيث تساءلوا لماذا لم يفعل هو ما طلبه من الفنانين، حيث أنه لم يزره ولم يساعده على التمثل، وأشاروا أن هاني شاكر نقيب الموسيقيين وليس نقيب الممثلين فلماذا يهاجمه.
ومن جانبه، تقدم الدكتور أشرف زكي، نقيب المهن التمثيلية، باعتذار رسمي للفنان هاني شاكر نقيب الموسيقيين بعد الانتقاد الحاد الذى وجهه أحمد فلوكس له بعد وفاة اليوتيوبر مصطفى حفناوى.
ودعا أشرف زكي الفنان هانى شاكر بأن يقبل اعتذار فلوكس خاصة أن نقيب الموسيقيين رفض اعتذار فلوكس على الملأ بعد أن بث فيديو على صفحته على “فيس بوك” يعتذر فيه لهاني شاكر.