روى الدكتور محمد علام، نائب مدير مستشفى النجيلة بمطروح، قصة إصابته ومعاناته مع فيروس كورونا المستجد.
وقال الدكتور محمد علام عبر صفحته الشخصية بموقع “فيس بوك”، “انا بخير لكل زمايلى وأهلى والناس اللى بعتولى وحاولوا يتصلوا بيا يطمنوا عليا اليومين اللى فاتوا بعتذر مكنتش قادر ارد عليكم، ناس سالتنى عن الاعراض مبدئيا الاعراض زى ماتكلمت من شهرين”.
وأضاف نائب مدير مستشفى النجيلة بمطروح، “بتختلف من شخص لشخص مينفعش اقول انا عندى كذا وكذا لان استجابه جسمى مش زى جسمك لكن هنعتمد على الدراسات اللى اتعملت على الالاف الحالات وشفناها فى الحالات اللى كانت عندنا وللاسف فى نفسنا”.
وتابع، “اولا الاعراض، أشهرها ارتفاع بدرجه الحرارة ودى فى حوالى ٨٠ ل ٩٠ ٪ من الحالات تستمر لايام وممكن تختفى وترجع تانى، تانى اشهر الاعراض سعال جاف فى حوالى ٦٠٪ من الحالات، واخر حاجه الم بالجسم وده فى حوالى ٤٠ ل ٥٠ ٪ من الحالات”.
واصل الدكتور محمد علام الكشف عن قصة إصابته بفيروس كورونا المستجد، “يعنى ممكن الموضوع يبدء بكل الاعراض او عرض واحد او حتى بدون اعراض نهائى، بعد كده المرحله الثانيه ضيق بالتنفس وارتفاع فى معدل التنفس وده خلال اسبوع من بدايه الاعراض او اقل حسب مناعه الشخص وده بدايه الالتهاب الرئوي ومش بيحصل لكل الحالات ولو محصلش فانت خلاص بتخف، لكن لما بيحصل بيبدء يزيد بسرعه خلال يومين فقط بيكون التهاب رئوى شديد وبيحتاج لجلسات واكسجين وتدخلات أخرى، وبعد كده بيومين فشل بوظائف التنفس وبتصل للوفاه لو متحسنش”.
تابع، “ده تسلسل المرض طبقا لاخر تحديث للصين على عدد الحالات اللى عندها وكمان CDC وغيرهم فى اجماع على الاعراض دى باختلاف النسب بفروق طفيفه اى اعراض اخرى فهى نادره جدا وتكاد لا تحدث زى الاحتقان بالحلق والرشح واضطرابات المعده”.
واستطرد، “ثانيا امتا اروح اكشف ؟؟ لو بدئت ارتفاع درجه الحراره وسعال اروح اكشف هيتعمل تحاليل واشعه وبعض الاسئله عن اماكن تواجدك اخر فتره واختلاطك بمرضي ايجابيين او مشتبه فيهم او دخولك مستشفيات لو حصل ان اى حاجه من دول تخلى الطبيب يشك هيتعملك مسحه لو لا فانت مفيش عندك حاجه، وارد جدا انك فى اى مرحله من دول تخف بدون اعراض او باعراض بسيطه او باعراض شديده او حتى فى مرحله حرجه، علشان كده المخالطين لحاله ايجابيه بيتقالهم يقعدوا فى البيت لمده ١٤ يوم لو مظهرش اعراض فانت كده اما كان عندك المرض بدون اعراض نهائى وخفيت او معندكش اصلا، انما لو ظهر اعراض حتى لو بسيطه درجه حراره او سعال فانت لازم يتعملك مسحه لان كده انت مشتبه فيه مش مخالط”.
واختتم نائب مدير مستشفى النجيلة بمطروح، قائلاً، “انما انا مريت بايه فللاسف لانى مدخن على بسيط والحمد لله بطلت لما تعبت فالاعراض كانت شديده شويه وكان فى التهاب رئوى بس بدء يخف وحاليا ارتفاع بدرجه الحراره متوقع وبخف كلها ايام وابقى سلبى (التدخين مش بيحمى)، مردتش اتصور قبل ماعرف اضحك لانكم عرفتونى متفائل مينفعش تشوفونى متشائم، بيكم انتم الوباء هينتهى والله بس ساعدوا بعض والتزموا بتعليمات وزاره الصحه ووعوا اللى مش فاهم”.