حرصت الإعلامية ياسمين عز على الرد على منتقديها عن تصريحاتها الأخيرة حول علاقة الرجل بالمرأة، مؤكدة على أنها لا تتعرض للهجوم من الرجال لأنهم كائنات بريئة.
حيث قالت ياسمين عز خلال برنامجها كلام الناس: «جماعة الست تبات برا والتحريض على خراب البيوت والصوت العالي بيتضايقوا من كلامي ومن جملتي إن مفيش كرامة بين الزوجين، ودي بتكون واحدة مشوعطة وبقول لها إنتي إيه دخلك بين المتزوجين؟ ومتجيش هنا تاني لأن كلامي عن الحنية للست المتهنية ومنطقتي محذورة عليكي لأن كلها دلع ولو قربتي هتتحرقي».
وأضافت ياسمين عز:«دي كرامتنا ورجالتنا وأحنا أحرار فيها، وبقول لـ المشوعطة اللي عايزة تكون ند بند مع الراجل إنتي حرة ولكن من محتوانا متغشيش وعن الصوت الجهل وإنتي أهله متتكلميش وعن رضا الرجال متحلميش».
وتابعت: «لما يحد يحب يعلق على كلامنا الراقي مينفعش يقول أي كلام وخلاص، لأن منظرك هيكون وحش، وكلامي ده مبني على أساس علمي زي قانون نيوتن الفعل ورد الفعل وعلم النفس، والحقد الكبير والغل من الراجل محاولة لخراب البيوت وهدم الأسرة واللسان السليط ما هو إلا دليل على شخصية مريضة وشخص اختار ينشر مرضه بين الناس وسمومه عشان يكونوا فاشلين زيه ويرتاتح ويقول مش أنا لوحدي».
ياسمين عز توجه نصيحة للسيدات
كما وجهت ياسمين عز نصيحة للسيدات، قائلة: «ربنا يحفظ كل ست أصيلة متحملة جوزها وما أفسده الدهر يصلحه راجل، ودوري على راجل تستند على كتفه لأنه حصن وسند وحماية بعد ربنا، وأنا مفيش راجل بيهاجمني لأنه كائن بريء وجميل زي ما ربنا خلقه ومعندهوش نار الغيرة، ولو حد تطاول عليا هرد بطريقتي ولكن مش بالألفاظ دي وكله عارف تربيتي، وكلام الشوارع بنسيبه لبتوع الشوارع ولا عزاء للغيرانين».