واصلت الإعلامية ياسمين عز تقديم نصائحها للفتيات، تحت عنوان دروس تفخيم الزوج، ووجهت خلال حلقة اليوم من برنامجها “كلام الناس” عبر قناة MBC مصر مجموعة من النصائح شرحت فيها مزايا طبيب الأسنان كزوج أو خطيب.
وقالت ياسمين عز مخاطبة متابعات برنامجها: “لو جوزك أو خطيبك دكتور أسنان يبقى أكيد ربنا بيحبك، عشان رزقك براجل فيه كل المواصفات اللي تتمناها وتحلم بيها أي ست، وينطبق عليه مصطلح فول أوبشن”.
وأضافت: “دكتور الأسنان لطيف ومتواضع ومتعاون ومؤدب، ولسانه بينقط شهد مكرر، وصعب تقابلي دكتور أسنان مش كاريزما ودمه خفيف، كاريزما ماشية على الأرض، وعامل زي المغناطيس، تلاقي نفسك لا إراديا بتتمغنطي وتتشدي ليه، وترتاحي في الكلام معاه، ومش عارفة إنت متجوزة دكتور أسنان ولا دكتور نفسي”.
تحدثت ياسمين عز عن التأثير النفسي الذي يتركه التعامل مع طبيب الأسنان قائلة: “عنده قدرة غير عادية على الاستيعاب والاحتواء، وتحملك في أقصى فترات عصبيتك، ولو تلاحظي صوته شتوي علطول ومائل للجاذبية”.
وتابعت: “تحسي إنه من كتر البنج اللي بيستخدمه انعكس على شخصيته وبقى هادي وبشوش”.
ولفتت ياسمين عز إلى ميزة عند طبيب الأسنان هي تخليص الناس من أصعب آلامهم بأقل شرح قائلة: “ألم الأسنان أشد آلام الجسم، واللي قادر يطيب آلام الأغراب أكيد هيعرف يطيب ألم المقربين منه وخصوصا مراته أو خطيبته”.
وأضافت: “المريض بيدخل له مش قادر يتكلم، لكن بيفهمها وهي طايرة ويحدد مكان الألم، مش محتاجة تشرحي إيه اللي مضايقك لو جوزك دكتور أسنان”.
وأشارت ياسمين عز إلى مواصفات طبيب الأسنان من حيث المظهر بقولها: “تلاقيه دايما بيلمع ونظيف طول الوقت، إيده وهدومه متعقمة وريحة النظافة بتفوح منها، من على بعد 10 متر تحسيه فواحة عطر جاية من بعيد”.
وربطت ياسمين عز بين تفاصيل عمل طبيب الأسنان وصفاته الشخصية قائلة: “مستحيل تلاقي دكتور أسنان أصفر، لإن مهنته ضد السواد والصفار، ودي صفات وحشة في الدنيا هو بعيد عنها”.
وتابعت: “مش هتلاقي زي إخلاص دكتور الأسنان، بيقعد بالسبع ساعات وشه في بق المريض من غير ما يمل”.
ونصحت ياسمين عز متابعات برنامجها بعدم الشك في سلوك طبيب الأسنان طول الوقت قائلة: “طول الساعات دي تفضلي تتصلي بيه وتبعتي رسايل وهو ميردش، فتفتكري إنه بيخونك مع واحدة تانية، وتطلعي كالعادة بتظلميه، لإنه أمين وبيحترم مريضه”.
واختتمت ياسمين عز قائلة: “لو جوزك أو خطيبك دكتور أسنان احمدي ربنا على النعمة اللي إنتي فيها”.