كشف الفنان هشام ماجد، تفاصيل برنامج الفرنجة الذي قدمه هو والفنان أحمد فهمي وشيكو في عام 2015، وأشار إلى أنه هو وأحمد فهمي كانا يرغبان في نفس الدور من فيلم بنات العم.
وقال هشام ماجد خلال تصريحات تليفيزيونية: الفرنجة أمتع تجربة صورتها في حياتي، وميزة الفرنجة إن إحنا كنا بنعمله بالروح القديمة بتاعتنا، اللي هي أول ما بدأنا نمثل، اللي هو لو معرفناش نجيب تصاريح للتصوير في الشارع، هنصور ونوّقف واحد على أول الشارع، عشان لو البوليس جه يعرفنا ونجري.
وأضاف: فكان في مغامرات كتير في تصويره، ومثلا كنا عايزين في إيطاليا نستحمى في النافورة، وده طبعا مش مسموح بيه هناك، فهل هنبوظ البرنامج؟ لأ هننزل ولو البوليس جه هنجري، ففي الآخر بعتبره فكرة هادفة جدا، بيوريك إننا لما بنسافر برا غصب عننا بنحترم القوانين اللي مش بنحترمها هنا.
وأعرب هشام ماجد، عن شدة حبه لـ الفنان الراحل سمير غانم، وقال: أستاذ سمير غانم الله يرحمه بالنسبة لنا حاجة كبيرة أوي، نادر لما يكون له حاجة أنا مش حافظها، وكان لينا الشرف إنه وافق يطلع معانا ضيف شرف في أول أعمالنا، وقف جنبنا جدا ومن بداياتنا كان بيتكلم علينا، وبيقول علينا دول مستقبل الكوميديا في مصر، وليا الشرف إن آخر حاجة هو صورها في السينما، كان مشهد في فيلم تسليم أهالي وأنا كنت معاه فيه.
لمتابعة أوان مصر عبر يوتيوب اضغط هنا
لمتابعة أوان مصر عبر فيسبوك اضغط هنا