كشف الفنان هاني رمزي، موقفًا جمعه بالزعيم عادل إمام فى كواليس فيلمه «غبى منه فيه» الذي نجح بشكل ملحوظ من الجانب التمثيلي والإخراجي، موكداً أنه كان دوماً موجود في كواليس الفيلم والسبب هو أولى تجارب ابنه رامي إمام في عام الإخراج عام 2004.
وقال هانى رمزى عبر صفحته الشخصية بـ موقع التواصل الاجتماعي «فيسبوك»: “عايز أقولكم على سر محدش يعرفه.. فيلم غبى منه فيه من الأفلام الأقرب لقلبى لأن الزعيم عادل إمام كان حاضر تصوير الفيلم كله وده لأن الفيلم كان من إخراج ابنه المخرج الموهوب رامي إمام”.
وأضاف : “حاجة كمان، المشهد الشهير ليا مع المرحوم طلعت زكريا بتاع التخطيط للمهمة، إحنا كنا اتفقنا إننا هنلغى المشهد ده بالكامل من الفيلم والزعيم عادل إمام هو اللى أصر إن المشهد يفضل موجود لأنه على حسب كلامه مشهد حلو وهيجيب ضحك كتير، وقد كان بالفعل.. ربنا يخليلنا الزعيم ويطولنا في عمره يا رب ويفضل ملهم ومعلم لينا كلنا”.
هاني رمزي: «أنا بتمنى يبقى في جزء تاني من غبي منه فيه»
كشف الفنان هاني رمزي من قبل عن أمنيته في الحياة أنه يريد عمل جزء ثاني من فيلمه الكوميدي “غبي منه فيه” وذلك من خلال حواره ببرنامج “show time”، الذي يعرض على قناة “سي بي سي” الفضائية في تمام الساعة 9 مساءً.
وصرح من خلال اللقاء قائلاً: “أنا بتمنى يتعمل جزء تاني من غبي منه فيه، وديه كانت أمنية الفنان الراحل حسن حسني، والنجم الراحل طلعت زكريا، ونيللي كريم متحمسة جداً أن يبقى في جزء تاني”.
وأضاف قائلاً: “أنا أتعرض عليا أكتر من سيناريو بس مش بيعجبوني فكنت برفضهم، انا عايز السيناريو يربط أحداث العصر اللي احنا فيه حالياً اللي هو السوشيال ميديا، يعني في الجزء الأول مكنش في حاجة اسمها سوشيال ميديا”.
واستكمل حواره قائلاً: ” اول لما الاقي السيناريو اللي عايزهُ للجزء التاني من الفيلم هبدء فيه تصوير على طول”.