علقت الفنانة مها أحمد، لأول مرة أثناء استضافتها في برنامج ” أسرار ” مع الإعلامية أميرة بدر، على قناة النهار، على مرض نجلها من ذوي الهمم.
قائلة: “أنا عندي أحمد ابني من ذوي الهمم، وبدخل أفك الهدايا اللي بكسبها من التيك توك وأطلعها لذوي الهمم بس مش لازم أقول كده”.
وقالت مها أحمد: “أحمد ابني من ذوي الهمم، والسبب في اللي حصله كان دكتور عمل خطأ طبي، ومقاضيتش الدكتور لانه مش هيرجعلي مخ ابني لأنه نقص اكسجين، والسبب وأنا بولد إن الدكتور شده بالشفاط، وبعدها خرجني ولدت في أوضة قيصري، ولو كنت قلت ساعتها عمرهم ما هيقولوا الحقيقة اللي حصلت جوه أوضة العمليات، وهو بالنسبالي الحياة وممكن ربنا يكون عمل كده عشان أدخل الجنه أنا وجوزي من غير ما نتعب في الدنيا”.
وأضافت: “ابني لحد دلوقتي تعبه متعة وراحة بالنسبالي، أنا مش بعيط عشان أحمد كده، لأنه مالوش ذنب في كده، أنا لما كان ابني بيرجّع كنت بدوق الترجيع، عشان طريقة الدوا كده فا بدوق عشان أعرف ده الدوا ولا لأ لان دي سموم”.
وتابعت: “وأنا نازلة لازم احكيله ولو ضحك بعرف ان كده الموضوع اللي رياحة اعمله هيمشي، وانا اي مكان بروحه باخده معايا ومجدي جوزي بيروح يشوف مكان مناسب عشان يبقى ينام فيه، واللي الناس متعرفوش انى كل سنة بدخل بيه المستشفى عشان عنده نقص حديد ومحدش يعرف حاجة غير أهلي، وعمري ما طلبت لا من النقابة ولا اي حد فلوس، ولا سعيت اني اجيبله معاش زي ما سيادة الرئيس عامل للأطفال ذوي الهمم، ولو بتاجر بابني كان زماني في كل بلد شوية”.
وأضافت: “هفضل اشتغل ع تيك توك، ولو جالي شغل في منصة هشتغل، وانا دخلت الجنة وانا في الدنيا، مش بعيط عشان اللي حصل لابني ولا أنه معيوب، لو من عند ربنا عادي لكن لما يبقى خطأ طبي ده اللي بيزعل، وأنا في الجنة هسمع منه ياماما وهجوزه في الجنة وربنا واعدنا في كده، ولكل أم ابن كده اصبري هتشوفي هيبقى إزاي في الجنة”.
برنامج “أسرار” تقدمه الإعلامية أميرة بدر على شاشة النهار يومياً في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.