كشفت الفنانة منة فضالي عن كواليس مسلسلها جعفر العمدة، مشيرة أنها تنتقد نفسها باستمرار ولا تشاهد أعمالها، كما تحدثت عن موقفها من الزواج .
وقالت منه فضالي خلال حوارها في برنامج مساء دي ام سي: أنا بثق في محمد سامي؛ لأنه مخرج متميز وأمين على الممثل وبيخاف عليه وبيحبه ولو مشهد واحد بس هوافق أعمله مع محمد سامي؛ لأن عنده كل الممثلين واحد ولو واحد مبيعرفش يمثل هيخليه يمثل.
وأضافت: كنت خايفة يبقى دمي تقيل في جعفر العمدة؛ لأني مجربتش أعمل كوميدي وعمري ما شوفت نفسي دمي خفيف وعمري ما اتفرجت على مشهد ليا بعد ما أخلص؛ لأني دايما بنتقد نفسي وبشوف نفسي مبعرفش أمثل وممكن أسمع ردود الأفعال بس واتطمن.
كما تطرقت منة فضالي في حديثها عن شخصية نرجس بـ جعفر العمدة: نرجس هي الشخصية الوحيدة من زوجات جعفر العمدة اللي دايما بتتهان وبيحسسوها إنها قليلة وبالتالي قررت تنفصل ورسالتها في المسلسل كانت حول كرامة المرأة؛ لأنها مكنتش طمعانة في جعفر العمدة إنما كانت عايزة تخلف وتعيش عادي وتقضي على فكرة الجدول.
وتابعت منة فضالي: نرجس مكنش ينفع ترجع لـ جعفر وكنت بعيط وأنا بعمل المشهد بس محمد سامي قالي لازم تكوني متماسكة لأنك سيباه عن قناعة، وفي النهاية أنا مبسوطة أن الناس حبوا الشخصية وتفاعلوا معاها.
كما تحدثت منة فضالي عن موقها من الزواج، حيث قالت: أنا واخدة موقف من الجواز واتعودت أبقى لوحدي ومبسوطة كدا؛ لأني مبحبش حد يتحكم فيا واتقدملي كام حد بس خلاص، مبحبش حد يقولي أنتي خارجة وجاية أمتى، أنا ممثلة وبرجع بليل.