روى مدير أعمال نجم الأكشن العالمي «جون كلود فان دام»، كواليس التحدي الأخير الذي حدث بين الفنان الكوميدي محمد هنيدي، وفان دام، لافتًا إلى سعادة الكثير من الدول الأجنبية بما حدث.
وذكر «وليد التلباني» في تصريح خاص لـ «أوان مصر»، قائلًا: الموضوع ابتدى من كام شهر، لما أحد الفانز نزل صورة للفنان محمد هنيدي، في محي الشرقاوي، وكان في الوقت دا فاندام معايا بنتكلم فيديو كول بخصوص الشغل، فلفتت نظرة الصورة فقالي اي دا وأنا شرحتله الموضوع، ومن هنا بدأت وسائل التواصل الاجتماعي تتكلم.
وليد التلباني يروي كواليس التحدي بين نجم الأكشن ومحمد هنيدي
وأستكمل التلباني قائلًا: الموضوع كان هدى شويه، فرجع تاني من 10 أيام، موقع نزل صورة لفاندام وشاروخان فهنيدي دخل يهزر وعمل كومنت، بصورته مع المرحوم علاء ولي الدين، وكريم عبد العزيز، وأحمد السقا، وعلق قائلاً: صورة تشع أكثر فخامة.
وأردف التلباني: بعدها فاندام شاف الصورة معايا تاني وراح نكش هنيدي، وابتدى من هنا هزار ما بينهم، وفاندام رد قاله انت شكلك مُصِر على التحدي تحت سفح الهرم، والموضوع دخل في هزار بينهم ومواقع التواصل الاجتماعي اشتعلت، وكنت أنا مع فاندام ولما بلاقي حاجه مكتوبة بالعربي بترجمهاله، والموضوع كان ضحك.
من جانبه كان قد كشف «وليد التلباني» وكيل أعمال نجم الأكشن فان دام حقيقة التعاون بينهم في عمل فني جديد وذكر في تصريح خاص لـ «أوان مصر» قائلًا: “أنا يسعدني أن عملاق الكوميديا أستاذ محمد هنيدي يشارك بطولة عمل فني مع فان دام”.
حقيقة تعاون الفنان محمد هنيدي مع نجم الأكشن فان دام في عمل فني
وواصل «التلباني»: “ولكن ليه ينزل خبر كذب على إحدى المواقع الإلكترونية بيقول أن فان دام وهنيدي، هيعملوا فيلم مع بعض، ومواقع أخرى قالت في أخبار شبه مؤكدة عن دا، وهما ميعرفوش مصدر الكلام اي”.
وأستكمل: “مينفعش يقولوا أن في حاجة زي كدا هتحصل إلا اذا كان في كلام في حاجه زي كدا بين النجمين، والموضوع كبر والصحف الأجنبية كتبت عنه، والأستاذ محمد هنيدي الأجانب بدأوا يسألوا مين هو هنيدي”.
وأكد التلباني قائلًا: “بأكد أن طول ما مفيش حاجه رسمية اتكلموا فيها النجمين مع بعض، أو أنا بالنيابة عن فاندام صرحت بدا على صفحتي، يبقى مفيش كلام من دا حصل، وإن كنت أنا شخصيًا، برحب بالفكرة، وعرضتها على فاندام، وعرضتها على هنيدي، وأنا شايف إن مفيش رفض، ولكن طول ما مفيش كلام رسمي وورق اتقدم يبقى مفيش حاجه”.