تحدث الفنان محمد عطية، عن اكتسابه فكرة تقبل الفشل، مشيرًا أنه يتعلم من تجاربه الماضية ويعمل على تطوير ذاته وموهبته، بالإضافة إلى حديثه عن رأيه الشخصي في العلاقات العاطفية.
وقال محمد عطية في تصريحات إذاعية: لازم يكون في فكرة تقبل الفشل، دي سيكولوجية مهمة جدًا إنك تبقي عارفة وإنتي بتعملي عمل أن هيكون فيه نسبة نجاح ونسبة فشل، وأنا توصلت لمرحلة أن مفيش حاجة تزعلني وتخليني أكتئب، الحياة بتمشي والزمن أشطر حاجة في الدنيا وبيخلينا ننسنا الناس القريبين مننا واللي بتموت والفشل، كل حاجة بتعدي.
وأضاف: أنا عايش حياتي وبجتهد وبحاول أطور من نفسي، ولو حاجة فشلت هشوف إيه العيوب وأصلحها، وأنا عديت بنجاحات كبيرة وفشل كبير، وقاعدة في البيت بسبب إدارة أعمال 6 سنين، وكل حاجة.
أما عن رأيه في العلاقات العاطفية، قال محمد عطية: الحب مش أساس العلاقة، الأساس أن إزاي تقدر تعيش مع الشخص، والفكرة كلها أن تدور على حد يعرف يتأقلم معاك وتتقبلوا بعض وتعرف تختلف معاه، لازم يكونوا محترمين عقلية وخصوصية بعض، أنا مثلًا معرفش أبقى مع واحدة شخصيتها ضعيفة ومش مستقلة ومؤمنة بالمساواة، وأنا بالنسبة ليا الراجل زي الست، ومقدرش أكون مع واحدة بتتعامل معايا إنها أقل مني.
كما تحدث محمد عطية، عن تجربة مشاركته برنامج ستار أكاديمي، حيث قال: حاولت كتير إني اشتغل، وكنت بستنى عمرو دياب عند الاستوديو بالـ 8 ساعات ومبعرش أشوفه، وتامر حسني كنت بستناه عشان أسمعه أغنية، وأنا محظوظ إني عديت بالمشوار ده وفي نصه جت محطة ستار أكاديمي غيرت حياتي كلها، وبقى تامر حسني يكلمني وعمرو دياب عارف اسمي.