تحدث النجم المصري لاعب ليفربول الإنجليزي محمد صلاح مع صاحبة السعادة في اللقاء الخاص، في الحلقة الثانية الذي أجرته إسعاد يونس مع نجم مصر.
وكشف صلاح عن أصعب موقف مر عليه في مشواره وقال :” اقترح عليا زميلي في النادي اننا نروح عند خاله بدل مانرجع الغربية في البيت، ولكن اتصدمنا في الاخر ومروحناش عند خاله، وقررنا ننام في الاستراحة في النادي اللي بنتمرن فيه”.
“مرة انا ولاعب في المقاولين قالي تعالى نبات الأسبوع ده في القاهرة عند خالي فكلمت أبويا إداني 60 جنيه “كان بيوفر” .. المهم روحنا لخالو في العاشر من رمضان فـ ملقيناهوش، وفضلنا لـ بالليل مش عارفين نعمل أيه فـ قالي هنروح لواحد حبيبي نبات عنده لقيته رايح التُرب قولتله لأ مش هعرف أبات وأنام هنا “.
“قالي أنا أعرف واحد في النادي حبيبي هنبات هناك من ورا النادي فـ روحت فارش عند بوابة نادي المقاولين وحطيت الكوتش بتاعي تحت دماغي وصحيت الساعة 6 الصبح قبل ما ييجوا فطرنا وروحنا التمرين”.
“تاني يوم خاله برضو مكنش موجود ومعرفناش ننام عند البوابة عشان كانوا بيعملوا حاجة هناك فـ نمنا في ملعب من ملاعب النادي .. فرشنا بطاطين ونمنا على الأرض والدنيا كانت شتا وتلج”.
“وقتها كنت عايز أعمل أي حاجة عشان أصحى أروح التمرين ، وكنت مكسوف أقول لأبويا عاوز فلوس تاني رغم إنه كان هيديني فكان يقولي مرتاح؟ اقوله أه يقولي عايز فلوس؟ أقوله لأ مع اني عايز”.
وأضاف :” نمت على الأرض وفرشت حاجه كده نمت عليها لحد الصبح وصحيت قبل ما التمرين قبل مايبدأ “.
وفي حديثه عن ناديه الماضي:” نادي المقاولون العرب هو أفضل قطاع ناشئين في مصر”.
وقال صلاح عن أكثر شخص كان مؤمن بموهبته وكان داعم له طوال تلك السنين:”والدي هو أكتر حد كان مؤمن بموهبتي .. والدتي كانت بتخاف عليا وكانت بتدعمني بردوا لكن والدي كان مهتم أكتر”.
واستعرض صلاح في حديثه عن وجباته في أيامه العادية وقال أكلي عبارة عن سلطة وجنبها أي حاجة.. رز أو بروكلي”.
وأضاف :” بحس بالذنب لما باكل فطير مشلتت “.
وأضاف :” الأكل بتاعي محدد وبنعمل الأكل أنا وماجي زي بعض ومعود مكة وكيان على نفس الأكل.. لكن مكة بتتخانق معايا دايما بسبب الشيكولاتة”.
كما قال نجم منتخب مصر ونادي ليفربول الإنجليزي، محمد صلاح خلال لقاءه مع الإعلامية إسعاد يونس إنه أثناء لعبه مع المنتخب المصري يشعر بالفخر: “احلى إحساس في الدنيا لما بلعب مع لمنتخب المصري”.
واستعرضت صاحبة السعادة تقريرًا مصور لمحمد صلاح خلال لعبه مع المنتخب المصري، وذلك مع غناء الفنانة شادية بأغنية “ياحببتي يامصر”، مستقبلته بالمكسرات والأرز باللبن.
وكانت قد نشرت الإعلامية إسعاد يونس عبر صفحتها على منصات التواصل الاجتماعي، مقطع فيديو تشويقي عن لقاءها المرتقب مع النجم المصري محمد صلاح، والذي يذاع عقب فوز ليفربول بكأس الربطة الإنجليزية.