قال الفنان محمد رياض إنه تخرج في كلية العلوم، وكان يحب الكيمياء كثيرًا، والتحق بقسم الأبحاث والتطوير في إحدى الشركات، ووصل لدرجة أنه اخترع بعض المركبات وأطلق عليها اسمه.
وتابع محمد رياض، خلال لقائه في برنامج “معكم منى الشاذلي”، عبر شاشة قناة cbc، أنه عمل في مجال الكيمياء قبل دخول الفن، حيث قال: “أنا اخترعت حاجات.. والله العظيم عملت حاجات باسمي قبل ما أسيب الشركة اللي كنت بشتغل فيها، سبتها لأن خلاص مكنش هينفع اكمل عشان التمثيل، وكنت شغال في الأبحاث والتطوير بتاع الشركة”.
وأضاف: “أنا كنت لسه متخرج من كلية علوم وشغال كيمائي الصبح وبشتغل في معمل تحاليل وبشتغل في مدرسة بنات 3 أيام في الأسبوع لكنهم رفدوني”.
وأردف: “كنت لسه صغير عندي 22 سنة وشعري أصفر وحليوة وبروح لابس بتيشيرت وبنطلون جينز.. وأول ما دخلت المدرسة لقيت الطابور بقى فيه همس.. بنات بقى كلهم 18 سنة وعمالين بيتكلموا مين ده وبتاع”.
وواصل محمد رياض: “شوية ودخلت الفصل لقيت كله بنات وقاعدين جنب بعض بين الديسكات وزحمه، طلع إن البنات جم من فصول تانية يحضروا حصة الكيميا.. يعني المفروض الفصل 25 بـنت لقيت عندي 60 بنت.. وتقريبا الكيميا احلوت في عينهم ساعتها”.
وقال رياض إلى أنه في اليوم التالي طلب منه المدير ألا يحضر طابور الصباح مرة أخرى، ففعل ذلك، واستمر في العمل لفترة، إلى أن استدعاه المدير مرة أخرى لمكتبه، معلقًا: “المدير قالي أنت شخص كويس جدا ومدرس هايل ولا غبار عليك، بس أنت مش هينفع تكمل معانا.. أنا عندي بنات صغيرين ومينفعش احط الزيت جنب النار.. واترفدت من غير ما اعمل حاجة”.