عبر الفنان ماجد الكدواني عن مدى حبه لـ الفنان كريم عبدالعزيز، مؤكداً على علاقة صداقتهما التي بدأت من 24 سنة، كاشفاً عن سر حبه لـ النجم كريم عبدالعزيز، وذلك خلال لقائه مع الإعلامي عمرو أديب في برنامجه الحواري بودكاست Big Time.
قائلاً: «أكتر حاجة بتعجبني في كريم الأمانة ، مصداقية ، عنده حتة من القلب للقلب، واحنا بنقعد نتكلم مع بعض كدة .. مرة قالي يا أخي أنا مش فاهم الناس بقت عاملة كدة ليه؟ هو احنا شكلنا غريب قدام الناس ليه؟ هي حاجة غريبة إن اتنين بيحبوا بعض لله في لله؟».
مضافاً: «ومرة قعدنا نتكلم مع بعض في التليفون 8 ساعات والكلام بيجيب بعضه، وهي فين وفين لما بتحصل بس بنبقى فعلا محتاجين نتكلم مع بعض، عارف اللي جعانين يتكلموا براحتهم؟ جعان وعطشان آخد راحتي في الكلام .. أكلمك من غير حساب لأني عارف إن مفيش رقابة وانت مش هتحاسبني .. أنا قدامك صافي لا همسك عليك حاجة ولا هتمسك عليا حاجة، ده سر علاقتي بكريم .. نغلط نتعاتب نشتكي لبعض بس محدش هيمسك على حد حاجة ، دي ثقة مفتقدينها دلوقتي».
ماجد الكدواني: أنا وكريم عبدالعزيز صحاب من 24 سنة
متابعا: «والحمدلله والشكرلله وربنا يديمها نعمة احنا أصدقاء بقالنا 24 سنة، ربنا يحمي الصداقة دي من العين .. إنسان جميل وقلبه صافي وهو دايمًا يقولي احنا فولة بس ماتقسمتش نصين».
مختتماً: «مراتي دايما بتقولي ربنا يبعد عنكم العين بس قولتلها حاجة .. كريم عبد العزيز ده لو في يوم زعل واتنـرفز وقــلع الجـزمة وإداني بيها هسامحه عشان ميبقاش الحسـد دخل بينا ، ويعلم ربنا وشهادة قدامكم لو عمل فيا أيه لا يمكن نفترق».