تحدثت أسما شريف منير ابنة شريف منير، على حالة الهجوم التي تعرضت لها الفترة الأخيرة، وخاصة بعد قيامها بـ حلاقة شعرها ع الزيرو .
وقالت أسما شريف منير عبر حسابها الشخصي بموقع تبادل الصور والفيديوهات القصيرة انستجرام، في بث مباشر: الناس اللي بتشتم دي متعلمتش حاجة هو أنت شايف لما بتشتم حد بتاخد حسنات؟ أنت كده دكر أنت كده محصلتش؟ بتتعلم إيه وبتعلم اللي حواليك إيه؟، ربنا يهديهم وأنا ولا بفكر في الناس دي.
وأضافت: اللي بيزعلني أن الناس اللي بتشتم دي أكبر ناس مُدعيين ولو دخلنا عندهم بنلاقي كاتبين لا إله إلا الله وفلسطين الحرة، دول ناس مش حقيقية وكدابة، الناس مبقاش عندها دم وفي كمية نفاق وكدب وانفصام في الشخصية رهيبة، لو أنت مسلم أو مسيحي الديانتين بينادوا بالاحترام، لما انت تصدر ده للناس متزعلش لما يقولوا علينا همج.
أسما شريف منير ترد على منتقديها
وتابعت أسما: أنا مش شيخة أنا إنسانة نفسي اتعامل مع بني آدمين طيبين، والدين أخلاق سواء إسلامي أو مسيحي، واللي الناس بتعمله ده مش منطقي، لازم نتعلم منبقاش همج ونعمل اللي دينا قال عليه باللي نقدر عليه، أنا مش محجبة وبغلط في حاجات، واللي بيحصل ده لازم يعلمنا حاجة، بلاش إدعاء وتوكلوا نفسكم إنكم تربوا الناس، ظبط نفسك الأول وشوف الطريقة اللي المفروض تكلم بيها الناس ولو عايز تساعد في هداية حد تتكلم إزاي.
View this post on Instagram
وأردفت: المفروض تقوله ده الدين حلو أوي وافتح نفسه على الدين، لو أنت شايف إني مش مسلمة وطلعتني من الديانة، هل علشان أدخل تاني الإسلام شايف أن دي الطريقة اللي تدخلني بيها تاني؟ يا جماعة والله العظيم ما ينفع اللي بيحصل ده، والله في ناس مافيش فيها فايدة وموجودين علشان نتعلم أن منبقاش زيهم، أنا مش زعلانة إنهم بيشتموني أبدًا ومحصنة نفسي منهم، اللي مزعلني أن في ناس فعلًا بيصدقوا نفسهم لدرجة الجنان وشايفين أنهم صح.