منذ ظهور الفنانة القديرة لبنى عبد العزيز على الشاشات وفي الأفلام السينمائية، أصبحت واحدة من أهم وأشهر نجمات جيلها، وحققت شهرة واسعة.
ولكن بـ مجرد ذكر اسم «لبنى عبد العزيز»، تتذكر فيلم الوسادة الخالية، التي قامت بدور البطولة النسائية أمام العندليب الأسمر عبد الحليم حافظ.
و قالت لبنى في تصريح خاص لـ موقع «أوان مصر» الإخباري: «فيلم الوسادة الخالية أكتر فيلم له مكانة في قلبي، ممكن علشان هو أول أفلامي في السينما».
لبنى عبد العزيز: عبد الحليم مكنش عاوزني في الوسادة الخلية
وأضافت عبد العزيز: «عمري ما أنسى أبدًا خوفي ورعبي في كل المشاهد اللي مثلتها قصاد عبد الحليم، خاصةً أن اللي عرفتوا بعد ما نجحت وعمرت الدور حلو أن عبد الحليم حافظ مكنش عاوزني في الدور ده، وأنه رشح سعاد حسني وفاتن حمامة، بس لأنه دور لبنت صغيرة، محدش فيهم كانت موافق».
وتابعت: «والأيام تدور وتلف وإلاقيني أنا اللي كنت مرشحة أعمل فيلم خلي بالك من زوزو، وقريت فعلًا الفيلم وتعاقد مع حسن الإمام، بس لما قريت كذا مشهد منه، رفضت أني أعمله وفسخت التعاقد».
وأختتمت: «شوفت كذا مشهد لما الفيلم اتعرض وقولت الحمد لله أني معملتوش، وكان رفضي كله على الرقص، وأتقالي لا خليكي وهنجيب دوبليرة، وقتها حمدت ربنا أني مبعرفش أرقص».