كشف الفنان كريم قاسم عن دوره في مسلسل «زينهم»، وذلك خلال استضافته في بودكاست قهوة باللبن الذي تقدمه الفنانة جيلان علاء.
وقال: «ما هو مفيش شخصية انا عملتها محطيتش جزء مني فيها في زينهم مثلاً كان خوف وبيخاف من الـدم ومن الأشباح فـ انا زودت عنده الحتة من شخصيتي في الحقيقة وزينهم استمتعت بيه اوي .. انا كنت بلعب وبراحتي والمخرج كان جميل».
مضافًا: «وأنا وأحمد داود واخدين على بعض وبنلعب سوا يعني لو النور بالصدفة رعش نبص عليه ونكمل أو لو أنا غلطت وهو غلط عادي نكمل بعض … فـ زينهم بالنسبالي كان تجربة مميزة اوي».
كريم قاسم: مسلسل زينهم أحسن حاجة حصلتلى في 2023
وسبق وقال الفنان كريم قاسم، إن «مسلسل زينهم أحسن حاجة حصلت لي السنة دي ودي حاجة كويسة الواحد يقفل بيها السنة».
وأضاف كريم في تصريحات إذاعية: “شخصيته دكتور جيمي متلبساني أوي وأي حد من أصحابي بيشتكي لي من حاجة في جسمه بقيت بقول له وريني كده وأقعد أفسر له وأتحقق من الموضوع.. كنت متخيل الموضوع هيبقى أصعب من كده لكن اللذيذ إن الكاتب طبيب فكان في مصطلحاته وتفسيره ساعدنا، وكان فيه أصدقاء دكاترة ساعدونا وبرده من كتر الفرجة على شخصيات الدكاترة قبل كده».
الحلقة الأخيرة من مسلسل زينهم
وأشار: “التركيز في المسلسل أكتر على القضايا والجانب الاجتماعي للشخصيات والمخرج بذكاء حاول يتفادى مناظر الجثث والإصابات علشان يبقى مناسب للأطفال والعيلة مع إنه كان يقدر يدخل في التفاصيل».
وأوضح كريم قاسم: «أول ما قريت الورق حسيت إن جيمي ده دوري ومكتوب لي لأني كنت متخيل هعمل فيه إيه، واللي اتنفذ كمان عدى اللي كنت متخيله بعد التعاون مع المخرج اللي كان فاهم جدًا وكمان الشغل مع أحمد داوود زي لعب الكورة وبنساعد بعض وكنا داخلين ننبسط وكنا محضرين كويس».
وأكد: «كنت خايف طبعًا، ولأول وهلة دخول المشرحة رغم إنها ديكور لكن كأنها مشرحة حقيقي وفيها قبضة، ومع أول جثة وتصوير كان الموضوع بيخض لحد لما اتعودنا بعد كده».
مسلسل «زينهم» بطولة أحمد داوود، كريم قاسم، سلمى أبو ضيف، هناء الشوربجي، محمد أبو داوود، أحمد الرافعي، عماد رشاد، وآخرين، تأليف محمد سليمان عبد المالك، وإخراج يحيى إسماعيل.