كشفت سيدة عن تعرض لنجلها لواقعة عقر من كلب ضال بشوارع مدينة حدائق الأهرام ومعاناتها الشديدة أثناء إبلاغ الطب البيطري عن الواقعة لاتخاذ الإجراءات اللازمة لحماية أطفال المنطقة من تكرار الواقعة مرة أخرى.
وقالت السيدة، إن نجلها تعرض للهجوم من كلب ضال في حدائق الأهرام، متابعة: «تعرض ابني لهجوم كلب في حدائق الأهرام طلع له من تحت عربية افترسه من ايده، وهو ولا بيخاف من الكلاب ولا جري ولا عاكسه علشان بس قبل ما حديقولي عمل ايه للكلب، وتوجهنا لمستشفى الهرم أخد المصل فقط لم يتم أي نوع من التعامل مع الجرح اللي كان بينزف واحنا لسه في المستشفى».
وأضافت: «الكلب من المنطقة ومش مسعور وحي يرزق وعايش وسط صحابه ورايح جاي في الشارع عادي وخوفًا على تعرض أي طفل أو شخص كبير لهجوم مشابه قررت أبلغ الخط الساخن، الرقم كان مرفوع من الخدمة وفي رقم تاني ما جمعش».
واستكملت شكواها: «لما السكك الرسمية تقفل بضطر الجأ لبعض المسئولين المحترمين ومنهم النائب أحمد السجيني اللي حقيقي بشكره على سرعة تواصله معايا، وتوجيه المسئولين في الطب البيطري للتواصل معايا وتحديد المنطقة ووصف الكلب اللي هاجم الولد».
وأكدت أنها لا تريد من حديثها توجيه الدعوة بقتل الكلب ولكنها ترغب في طرح بعض الأسئلة على كل المسئولين عن المنظومة سواء حكومة أو مجتمع مدني أو نواب.
وتابعت: «السادة المسئولين في وزارة الصحة مشكورين بتدونا الأمصال مجانًا، لكن عندي سؤال الدفتر اللي بتقيد فيه الحالات واللي كان قبلنا امبارح بس مكتوب في الصفحة قصادي 6 حالات من حدائق الاهرام، حضراتكم بتعملوا تحليل للبيانات دي؟ أكيد بتطلبوا تحددوا مكان مهاجمة الحيوان علشان تحللوا البيانات، وتحددوا إيه الأماكن الأكثر خطورة، أكيد مش سد خانات، والا هو سد خانات وانا اللي طموحة؟».
وأضافت: «لما يبقى عند حضراتكم حصر بمناطق مختلفة فيها حالات متكررة بشكل يومي زي كده بتعملوا ايه؟ في أي إجراء؟ هل وزير الصحة بيقدم البيانات للحكومة هل في اجتماع مع الطب البيطري يشوفوا هيعملوا في الأماكن الأكثر تضررًا؟».
واستطردت: «لما يبقى الحيوان اللي هاجم إنسان لسة في الشارع مش مفروض حد يتصرف؟ مش مفروض أصلا في قانون طلع من المجلس وصدر رسميًا برقم رقم 29 لسنة 2023 وعندك مادة بتقول تتخذ السلطة المختصة الإجراءات اللازمة لمجابهة الحيوانات الضالة أو المتروكة التى تشكل خطرُا على الإنسان أو الحيوان وذلك بمراعاة معايير وتوصيات المنظمة العالمية للصحة الحيوانية وغيرها من المنظمات الدولية المتخصصة؟»، معقبة: «النص بيتكلم عن التدابير في حدود إمكانيات الدولة، حد يقولنا ايه إمكانيات الدولة طيب ؟والا الناس هي اللي مطلوب منها تكافح الحيوانات الخطرة في الشوارع؟».
وأوضحت: «مجموعات الرفق بالحيوان، هل في حد عمل أي دراسات سلوكية على كلاب الشوارع، حد عمل أي دراسة تقول ليه كلب يعتدي على طفل ماشي عادي في أمان الله؟ أو ست واقفة في الشارع تلاقي كلب هبشها من رجلها، أو ست يتلم عليها مجموعة كلاب؟، بالنسبة للنواب، وأنا عارفة إن في نواب اتحركوا في الملف كتير، بس وبعدين لما الجهات التنفيذية لا تستجيب يبقى ايه الحل؟».
واختتمت حديثها قائلة: «أنا ولا عايزة أقتل كلاب الشوارع، ولا عايزة حد يشوف اللي شفته في ابني كل أملي بس أي حد يتحرك نلاقي حل».